ഐപിഎല് പതിനൊന്നാം എഡിഷനില് താരമായിരിക്കുകയാണ് രാജസ്ഥാന് റോയല്സിന്റെ മലയാളി താരം സഞ്ജു സാംസണ്. ബാറ്റിങ്ങില് മികച്ച പ്രകടനം നടത്തുന്ന താരം ഇതിനോടകം തന്നെ ക്രിക്കറ്റ് ലോകത്തിന്റെ പ്രശംസപിടിച്ചു കഴിഞ്ഞു. രാജസ്ഥാന്റെ ആറ് മത്സരങ്ങള് പൂര്ത്തിയായപ്പോള് മൂന്ന് ജയവും മൂന്ന് തോല്വിയുമായി പോയിന്റ് പട്ടികയില് ആറാം സ്ഥാനത്തുള്ള ടീമിന്റെ ജയങ്ങളിലെല്ലാം നിര്ണായക പങ്കുവഹിച്ച താരം ഓറഞ്ച് ക്യാപ്പും സ്വന്തമാക്കിയിരിക്കുകയാണ്.
താരത്തിന്റെ പ്രകടനം കണ്ട് ആരാധന മൂത്ത ഒരു ആരാധികയുടെ ചിത്രമാണ് ഇപ്പോള് സോഷ്യല് മീഡിയയില് വൈറലായിക്കൊണ്ടിരിക്കുന്നത്. മുംബൈ ഇന്ത്യന്സുമായി ജയ്പൂരില് നടന്ന മത്സരം കാണാനെത്തിയ ഒരു ആരാധിക സഞ്ജു എന്ന് തന്റെ കവിളില് എഴുതിയാണ് ശ്രദ്ധേയയാത്. ഷെഫാലി ചുഗ് എന്ന ട്വിറ്റര് അക്കൗണ്ടിലൂടെ വന്ന ട്വീറ്റ് രാജസ്ഥാന് റോയല്സ് റീട്വീറ്റ് ചെയ്യുകയായിരുന്നു. ഫോട്ടോ ഏതായാലും സോഷ്യല് മീഡിയയില് വമ്പന് ഹിറ്റായി.
മുംബൈ ഇന്ത്യന്സിനെതിരായ മത്സരത്തില് അര്ധ സെഞ്ച്വറി നേടിയ രാജസ്ഥാന് റോയല്സ് താരം ടീമിന്റെ ജയത്തില് നിര്ണായക പങ്കുവഹിക്കുകയും ഓറഞ്ച് ക്യാപ്പ് തിരിച്ചെടുക്കുകയും ചെയ്തിരുന്നു. ഈ സീസണിലെ ആദ്യ ആറ് മത്സരങ്ങള് പൂര്ത്തിയായപ്പോള് 239 റണ്സാണ് സഞ്ജുവിന്റെ സമ്പാദ്യം.