മോഹൻലാൽ നായകനായ ബ്രഹ്മാണ്ഡ ചിത്രം ഒടിയന്റെ 200 അടി ഉയരമുള്ള ഭീമാകാരമായ ഒരു കട്ട് ഔട്ട് തലസ്ഥാനനഗരിയിൽ ഉയരുമെന്ന് റിപ്പോർട്ടുകൾ ഉണ്ടായിരുന്നു. ഓൾ കേരള മോഹൻലാൽ ഫാൻസ് ആൻഡ് കൾച്ചറൽ വെൽഫെയർ അസോസിയേഷൻ സെക്രട്ടറി വിമൽ കുമാർ ആ വാർത്ത സ്ഥിരീകരിച്ചിരിക്കുകയാണ്. തലസ്ഥാന നഗരിയായ തിരുവനന്തപുരത്താണ് കട്ട് ഔട്ട് ഉയരുന്നത്.
വിജയ് ചിത്രം സർക്കാരിന് വേണ്ടി നിർമ്മിച്ച 175 അടി ഉയരമുള്ള കട്ട് ഔട്ടിന്റെ റെക്കോർഡ് ആണ് ഒടിയൻ കീഴടക്കാൻ പോകുന്നത്. വി എ ശ്രീകുമാർ മേനോൻ സംവിധാനവും ആന്റണി പെരുമ്പാവൂർ നിർമാണവും നിർവഹിക്കുന്ന ചിത്രം ഡിസംബർ 14നാണ് തീയറ്ററുകളിൽ എത്തുന്നത്. അന്ധകാരത്തെ കരിമ്പടമാക്കിയ ഒടിയന്റെ കഥ പറയുന്ന ചിത്രത്തിന് ഇതിനകം തന്നെ വമ്പൻ പ്രതീക്ഷ തന്നെയാണ് കൈവരിക്കുവാൻ സാധിച്ചിരിക്കുന്നത്. ചിത്രത്തിന്റെ ആദ്യഷോ രാവിലെ 5.45ന് തുടങ്ങുമെന്നും അറിയിച്ചിട്ടുണ്ട്. ഫാൻസ് ഷോ ടിക്കറ്റുകൾ ഒട്ടു മിക്കതും ഇതിനകം തന്നെ വിറ്റഴിഞ്ഞു എന്നാണ് റിപ്പോർട്ടുകൾ