പത്തനംതിട്ട തിരുവ ശ്രീവല്ലഭ ക്ഷേത്രത്തിനടുത്തുള്ള ‘സെലിബ്രിറ്റി മാടക്കട.’ അന്നാട്ടിൽ പ്രശസ്തമാണ്.
അവിടെ രുചിക്കൊപ്പം സ്നേഹവും നിറച്ച മോരും വെള്ളമൊരുക്കി കാത്തിരിക്കുന്ന ഒരാളുണ്ട്. ശ്രീപുത്തില്ലം ഭാസി എന്ന നാട്ടുകാരുടെ പ്രിയപ്പെട്ട ഭാസിച്ചേട്ടൻ.
തിരുവല്ല നിവാസികൾക്കു മാത്രമല്ല, കരയും കടന്ന് പ്രസിദ്ധമാണ് ഭാസിച്ചേട്ടന്റെ മോരും വെള്ളം.ഈ മോരും വെള്ളം ഒരിക്കൽ കുടിച്ചാൽ നാവിൽ നിന്നും ആ രുചി മാറില്ല എന്നാണു ഭാഷ്യം.
മോരൊഴിച്ചു തരുന്ന ആളെ ഒരിക്കൽ കൂടി സൂക്ഷിച്ചു നോക്കിയാൽ പലരും ചിന്തിക്കും, ‘എവിടെയോ കണ്ടു മറന്ന മുഖമല്ലേ ഇതെന്ന്’?തന്മാത്ര , കാഴ്ച , ചാർളി , ഒരു ഇന്ത്യൻ പ്രണയകഥ..തുടങ്ങി നിരവധി മലയാള സിനിമകളിൽ സാന്നിദ്ധ്യമറിയിച്ചിട്ടുള്ള നല്ല ഒന്നാന്തരം സെലിബ്രിറ്റി..നമ്മുടെ ഭാസിച്ചേട്ടൻ.
അങ്ങ് സിനിമയിലും `പിടിയുള്ളതു` കൊണ്ടാകണം പ്രമുഖർ , സിനിമ താരങ്ങൾ എല്ലാവരും തന്നെ ഭാസി ചേട്ടന്റെ സ്ഥിരം കസ്റ്റമേഴ്സാണ്. അതിനാൽ ഇതൊരു സെലിബ്രിറ്റി മോരും വെള്ളം എന്ന് പറയുന്നതിൽ തെറ്റില്ല…!!
നട്ടുച്ചയ്ക്ക് നല്ല ദാഹത്തോടെ ഈ മോരും വെള്ളം കുടിക്കുമ്പോൾ ഉണ്ടാകുന്ന കുളിർമ്മ പറഞ്ഞറിയിക്കാൻ കഴിയില്ല. അത് നേരിട്ട് രുചിച്ചു തന്നെ അറിയണം.