നിര്മാതാവിനെതിരെ ഹൈക്കോടതിയെ സമീപിച്ച് നടന് ശിവകാര്ത്തികേയന്. കോളിവുഡിലെ പ്രമുഖ ബാനറായ സ്റ്റുഡിയോ ഗ്രീനിന്റെ ഉടമ കെ ഇ ജ്ഞാനവേല് രാജയ്ക്കെതിരെയാണ് ശിവകാര്ത്തികേയന് ഹൈക്കോടതിയെ സമീപിച്ചത്. പ്രതിഫല തുകയായി നാല് കോടി രൂപ ഇനിയും ലഭിക്കാനുണ്ടെന്ന് ശിവകാര്ത്തികേയന് പരാതിയില് പറയുന്നു.
മിസ്റ്റര് ലോക്കല് എന്ന സിനിമയില് അഭിനയിക്കുന്നതിനായി 15 കോടിയായിരുന്നു പറഞ്ഞുറപ്പിച്ചതെന്ന് ശിവകാര്ത്തികേയന് പറയുന്നു. എന്നാല് 11 കോടി മാത്രമേ ഇതുവരെ നല്കിയിട്ടുളളു. നല്കിയ തുകയുടെ ടിഡിഎസ് അടച്ചിട്ടില്ലെന്നും ശിവകാര്ത്തികേയന് ആരോപിച്ചു. ചിയാന് 61, പത്ത് തല തുടങ്ങിയ സിനിമകള്ക്കായി പണം മുടക്കുന്നതില് നിന്ന് നിര്മാതാവിനെ വിലക്കണം. മൂന്ന് സിനിമകള് തിയേറ്റര്, ഒടിടി റിലീസ് ചെയ്യുന്നതില് നിന്നും അവകാശം വിതരണക്കാര്ക്ക് കൈമാറുന്നതില് നിന്നും വിലക്കണമെന്നും താരം ആവശ്യപ്പെട്ടിട്ടുണ്ട്. കേസ് വ്യാഴാഴ്ച പരിഗണിക്കും.
നിര്മാതാവില് നിന്ന് ലഭിച്ച 11 കോടിയുടെ ടിഡിഎസ് അടച്ചില്ലെന്ന് ചൂണ്ടിക്കാട്ടി ശിവകാര്ത്തികേയന് ഫെബ്രുവരി 1ന് ആദായനികുതി വകുപ്പിന്റെ നോട്ടിസ് ലഭിച്ചിരുന്നു. നോട്ടിസിനെ ചോദ്യം ചെയ്ത് നടന് ഹൈക്കോടതിയില് പ്രത്യേക റിട്ട് ഹര്ജി നല്കിയിരുന്നു. എന്നാല് ആദായനികുതി വകുപ്പ് 91 ലക്ഷം രൂപ പിഴയായി ഈടാക്കിയിരുന്നു.