തമിഴ് സിനിമ പ്രേക്ഷകർക്ക് എന്നും ഏറെ പ്രിയപ്പെട്ട നായികമാരിൽ ഒരാളാണ് ജനീലിയ ഡിസൂസ. സന്തോഷ് സുബ്രഹ്മണ്യത്തിലെ തുള്ളിച്ചാടി നടക്കുന്ന ആ പെൺകുട്ടി ഒരു ദശകം പിന്നിട്ടിട്ടും ഇന്നും പ്രേക്ഷകരുടെ പ്രിയ കഥാപാത്രമാണ്. ഭർത്താവ് റിതേഷ് ദേശ്മുഖിനും രണ്ടു മക്കൾക്കുമൊപ്പം സന്തോഷകരമായ ജീവിതം നയിക്കുകയാണ് നടിയിപ്പോൾ. വിവാഹത്തിന് ശേഷം സിനിമയിൽ നിന്നും മാറി നിൽക്കുകയാണ് പ്രേക്ഷകരുടെ ഈ പ്രിയങ്കരി.
ഡോക്ടേഴ്സ് ദിനത്തിൽ ഭർത്താവ് റിതേഷ് ദേശ്മുഖിനൊപ്പം തന്റെയും അവയവങ്ങൾ മരണശേഷം ദാനം ചെയ്യുവാൻ തീരുമാനമെടുത്തിരിക്കുകയാണ് ജനീലിയ. സോഷ്യൽ മീഡിയ വഴിയാണ് ഇരുവരും ഇക്കാര്യം വ്യക്തമാക്കിയത്. കുറേ നാളായി ഇതിനെ കുറിച്ച് ചിന്തിക്കുന്നുവെന്നും ഇപ്പോഴാണ് അതിനുള്ള അവസരം ലഭിച്ചതെന്നും പറഞ്ഞ നടി ഇതിനായി പ്രേരണയായ ഡോക്ടർ നോസർ ഷെറിയർക്കും ഫോഗ്സിക്കും നന്ദി അറിയിക്കുവാനും മറന്നില്ല. ജീവിതമെന്ന സമ്മാനമാണ് ആർക്കാണെങ്കിലും നൽകുവാൻ സാധിക്കുന്ന ഏറ്റവും വലിയ സമ്മാനമെന്നും അതിനാൽ എല്ലാവരും ഇതിൽ ഭാഗഭാഗുക്കൾ ആകാനും താരം ആവശ്യപ്പെട്ടു.