സോഷ്യൽ മീഡിയയിൽ ഇടയ്ക്കിടെ പ്രചരിക്കുന്ന തന്റെ വിവാഹമോചന വാർത്തകളോട് പ്രതികരിച്ച് നടി ശ്വേത മേനോൻ. ശ്വേത മേനൊനെക്കുറിച്ച് ഇടയ്ക്കിടെ സോഷ്യൽ മീഡിയയിൽ പല തരത്തിലുള്ള വാർത്തകൾ പ്രചരിക്കാറുണ്ട്. ഇതിനൊക്കെ കൃത്യമായ മറുപടി താരം നൽകുകയും ചെയ്യാറുണ്ട്. തന്റെ പേരിൽ വരുന്ന വാർത്തകളുടെയും മറ്റും താഴെ പോയി ഇടയ്ക്ക് കമന്റ് നൽകാറുമുണ്ട് താരം. ഇപ്പോൾ തന്റെ വിശേഷങ്ങൾ ആരാധകുമായി പങ്കു വെയ്ക്കാൻ എത്തിയിരിക്കുകയാണ് താരം.
കൗമുദിക്ക് നൽകിയ അഭിമുഖത്തിലാണ് ശ്വേത മേനോൻ മനസ് തുറന്നത്. താരസംഘടനയായ അമ്മയുടെ ആദ്യത്തെ വനിത വൈസ് പ്രസിഡന്റ് ആയിരിക്കുകയാണ് ശ്വേത. സ്വന്തം കുടുംബത്തിൽ ലഭിച്ച ഏറ്റവും വലിയ അംഗീകാരം ഇതാണെന്നും ആ സന്തോഷം തനിക്കുണ്ടെന്നും അമ്മയിലെ ഒരു അംഗമെന്ന നിലയിൽ നടി, നടൻ വേർതിരിവ് താൻ കാണിക്കാറില്ലെന്നും ശ്വേത പറഞ്ഞു.
ശ്വേത മേനോൻ വിവാഹമോചിതയായി എന്ന വാർത്തകളാണ് ഇപ്പോൾ സോഷ്യൽ മീഡിയയിൽ നിരന്തരം പ്രചരിക്കുന്നത്. ഇതിനെക്കുറിച്ച് ചോദിച്ചാൽ ആറു മാസത്തിലൊരിക്കൽ സോഷ്യൽ മീഡിയ തനിക്ക് ഡിവോഴ്സ് നൽകാറുണ്ടെന്നാണ് താരത്തിന്റെ മറുപടി. തനിക്ക് നല്ല തിരക്കുള്ളതു കൊണ്ട് അവർ ഇങ്ങനെ ചെയ്തു തരികയാണെന്നും ഈ കേൾക്കുന്നത് സത്യമാണോ എന്ന് ആരും തന്നോട് ചോദിക്കാറില്ലെന്നും തന്റെ സ്വകാര്യജീവിതത്തെക്കുറിച്ച് ഒരു പരിധിയിൽ കൂടുതൽ സംസാരിക്കുന്നത് തനിക്ക് ഇഷ്ടമല്ലെന്നും ശ്വേത മേനോൻ പറഞ്ഞു.