ബിഗ് ബോസിലൂടെ ജനപ്രീതി നേടിയ താരങ്ങളാണ് പൊളി ഫിറോസും ആര്യയും. ബിഗ് ബോസിനു ശേഷം സ്വന്തം യുട്യൂബ് ചാനലില് പ്രാങ്ക് വീഡിയോ ചെയ്ത് ഫിറോസ് തരംഗമായി. ആര്യയാകട്ടെ ബഡായ് ബംഗ്ലാവില് നിന്ന് മാറി വാല്ക്കണ്ണാടിയിലേക്ക് എത്തുകയും ചെയ്തു. ഇപ്പോഴിതാ ഈ ഷോയിലേക്ക് ഫിറോസ് അടക്കമുള്ള ബിഗ് ബോസ് താരങ്ങള് എത്തിയിരിക്കുകയാണ്. ഈ പരിപാടിയില് വെച്ച് ആര്യക്ക് വിവാഹമാലോചിച്ചിരിക്കുകയാണ് ഫിറോസ്.
തമാശകള് പറയുന്ന കൂട്ടത്തിലായിരുന്നു ഫിറോസ് ആര്യക്ക് വിവാഹമാലോചിച്ചത്. പുര നിറഞ്ഞ് നില്ക്കുക എന്ന വിഷയത്തിലായിരുന്നു ഫിറോസിന്റെ കമന്റ്, തനിക്കും പുര നിറഞ്ഞ് നില്ക്കുന്നൊരു സുഹൃത്തുണ്ടെന്ന് ഫിറോസ് പറയുന്നു. പണ്ട് പുര നിറഞ്ഞ് നില്ക്കുക എന്ന് പറയുന്നത് സ്ത്രീകള്ക്കായിരുന്നു. എനിക്കറിയാവുന്ന എന്റെ സുഹൃത്ത് പുര നിറഞ്ഞ് നില്ക്കുകയാണെന്നും, നല്ല പെണ്കുട്ടിക്ക് വേണ്ടിയുള്ള കാത്തിരിപ്പിലാണെന്നും ഫിറോസ് പറഞ്ഞു. പതിനെട്ട് വയസ്സ് മുതല് അവന് നല്ലൊരു പെണ്കുട്ടിക്ക് വേണ്ടി കാത്തിരിക്കുകയാണ്. ഇതുവരെ അവന് പെണ്ണ് കിട്ടിയിട്ടില്ല. ഇവന്റെ ബന്ധുക്കളും സുഹൃത്തുക്കളുമെല്ലാം കല്യാണം കഴിച്ചപ്പോള് ആകെ ട്രാജഡികളാണ് ഉണ്ടായത്. അതാണ് വിവാഹം ഇത്ര നീളാന് കാരണമായത്. ഇവന് എല്ലാം തികഞ്ഞൊരു പെണ്കുട്ടിയെ കണ്ടെത്തുന്നതിനായി സമയം മാറ്റിവെച്ചിരിക്കുകയായിരുന്നുവെന്നും ഫിറോസ് വ്യക്തമാക്കി.
ഇപ്പോള് ആള്ക്ക് വയസ്സ് അന്പതു വയസ്സായെന്നും ഇപ്പോഴും പുര നിറഞ്ഞ് നില്ക്കുകയാണെന്നും ഫിറോസ് പറഞ്ഞു. ആള് ഇപ്പോഴും പ്രതീക്ഷയിലാണോ എന്ന് ആര്യ ഫിറോസിനോട് ചോദിക്കുന്നുണ്ട്. അതെ പ്രതീക്ഷയിലാണെന്ന് ഫിറോസ് പറയുന്നു. എന്നെങ്കിലും ഒരു നല്ല കുട്ടിയെ കിട്ടുമെന്ന് പ്രതീക്ഷയിലാണ് അദ്ദേഹം. ആര്യയോട് ഒന്ന് ചോദിക്കാന് പറഞ്ഞിരുന്നു. ഞാന് ഈ അവസരത്തില് ആര്യയോട് അക്കാര്യം ചോദിക്കുകയാണെന്നും ഫിറോസ് പറഞ്ഞു. അദ്ദേഹം വളരെ നല്ല മനുഷ്യനാണ്. കോടീശ്വരനാണ്. ഹൃദയവിശാലത ഉള്ള മനുഷ്യനാണെന്നും ഫിറോസ് ആര്യയോട് പറഞ്ഞു. അറിഞ്ഞില്ലല്ലോ കുട്ടാ എന്നായിരുന്നു ആര്യയുടെ മറുപടി. ആര്യയുടെ മറുപടി സോഷ്യല് മീഡിയയില് വൈറലായിട്ടുണ്ട്.