Tuesday, October 27

കൈയ്യും കാലും കൂട്ടിക്കെട്ടി വായും മൂടി വെള്ളത്തിനടിയിൽ തല കീഴായി തൂക്കിയിട്ടു; ഷോട്ട് പൂർത്തിയായത് മൂന്നാമത്തെ ടേക്കിൽ..! കോബ്രക്ക് വേണ്ടി ജീവൻ പണയം വെച്ച് ചിയാൻ വിക്രം

Pinterest LinkedIn Tumblr +

ഏറ്റെടുക്കുന്ന കഥാപാത്രങ്ങളുടെ പൂർണതക്കായി ഏതറ്റം വരെ പോകുവാനും മടിയില്ലാത്ത നടനാണ് ചിയാൻ വിക്രമെന്ന് എല്ലാ പ്രേക്ഷകർക്കും അറിയാവുന്നതാണ്. കാശിയിൽ അന്ധനായി അഭിനയിക്കുവാൻ കഠിനാധ്വാനം ചെയ്‌ത വിക്രം ശങ്കർ ഒരുക്കിയ ഐയിൽ കൂനനാകുവാൻ സംവിധായകൻ ആവശ്യപ്പെടാതിരുന്നിട്ടും ശരീരഭാരം കുറച്ചിരുന്നു.

ഇപ്പോഴിതാ പുതിയ ചിത്രമായ കോബ്രക്ക് വേണ്ടിയും അത്തരത്തിൽ ജീവൻ പണയം വെച്ചൊരു പ്രകടനം നടത്തിയിരിക്കുകയാണ്. സംവിധായകൻ അജയ് ജ്ഞാനമുത്തുവാണ് ഇക്കാര്യം ഒരു ഇന്റർവ്യൂവിൽ പറഞ്ഞത്. കൈയ്യും കാലും വായും മൂടിക്കെട്ടി വെള്ളത്തിനടിയിൽ തല കീഴായി തൂക്കിയിട്ടുള്ള ഒരു സീനാണ് ഷൂട്ട് ചെയ്‌തിരുന്നത്‌. ഡ്യൂപ്പിനെ വെച്ചാണ് ആദ്യം ചെയ്തതെങ്കിലും ശ്വാസം എടുക്കുവാൻ ബുദ്ധിമുട്ടുള്ള കാരണം ഡ്യൂപ്പിന് അധികനേരം പിടിച്ചു നിൽക്കുവാനായില്ല. അത് കൊണ്ട് തന്നെ ഷോട്ട് കൃത്യമായി എടുക്കുവാനായില്ല.

ആ സീൻ ഒഴിവാക്കുവാൻ തീരുമാനിച്ച സംവിധായകനോട് വിക്രം തന്നെയാണ് ഡ്യൂപ്പില്ലാതെ ചെയ്യാമെന്ന് പറഞ്ഞത്. കൈയ്യും കാലും വായും മൂടിക്കെട്ടി വെള്ളത്തിനടിയിൽ തല കീഴായി തൂക്കിയിട്ടു ചിയാൻ വിക്രം ആ ഷോട്ട് എടുത്തെങ്കിലും സഹനടൻ കൂടുതൽ നേരം പിടിച്ചു നിൽക്കുവാനാകാതെ വന്നതിനാൽ ആ ഷോട്ടും ശരിയായില്ല. ഉള്ളത് വെച്ച് ശരിയാക്കാം എന്ന് സംവിധായകൻ പറഞ്ഞെങ്കിലും വിക്രം മറ്റൊരു ടേക്ക് കൂടി എടുക്കാം എന്ന് നിർബന്ധിക്കുകയും അത് ഓക്കെ ആകുകയും ചെയ്‌തു.

വിക്രത്തിന്റെ കണ്ണിലും ചെവിയിലും എല്ലാം വെള്ളം കയറുകയും ഒരു ഞരമ്പ് ബ്ലോക്കാവുകയും ചെയ്‌തു. ഉടൻ തന്നെ ട്രീറ്റ്മെൻറ് വേണമായിരുന്നെങ്കിലും ബാക്കിയുള്ള രംഗങ്ങൾ കൂടി ചിത്രീകരിച്ചിട്ടേ വിക്രം വൈദ്യസഹായം തേടിയുള്ളൂവെന്നും സംവിധായകൻ വെളിപ്പെടുത്തി.

“Lucifer”
Loading...
Share.

About Author

Comments are closed.