നടനായ പ്രണവ് മോഹൻലാലിന്റെ ജന്മദിനമായിരുന്നു കഴിഞ്ഞദിവസം. വീട്ടുകാരും അടുത്ത സുഹൃത്തുക്കളും ചേർന്ന് വളരെ ആഘോഷമായ രീതിയിലാണ് ജന്മദിനം കൊണ്ടാടിയത്. സോഷ്യൽ മീഡിയയിലൂടെ ആരാധകരും സുഹൃത്തുക്കളും മറ്റ് താരങ്ങളുമെല്ലാം ജന്മദിനാശംസകൾ അറിയിച്ചിരുന്നു. ഈ വൈകിയ വേളയിൽ പ്രണവിന് ജന്മദിനാശംസകളും ആയി രംഗത്തെത്തുകയാണ് താരത്തിന്റെ കളിക്കൂട്ടുകാരിയും കുടുംബ സുഹൃത്തുമായ കല്യാണി പ്രിയദർശൻ. പ്രണവിന് ആശംസകൾ നേരുന്നില്ലെ എന്ന ആളുകളുടെ ചോദ്യത്തിനുള്ള മറുപടിയാണ് ഈ കുറിപ്പ് എന്നും കല്യാണി പറയുന്നു.
കല്യാണിയുടെ കുറിപ്പ്:
എനിക്കറിയാം നീ സോഷ്യൽ മീഡിയയിൽ അത്ര സജീവമല്ലെന്ന്, അതുകൊണ്ട് തന്നെ ഇത് കാണാനും സാധ്യതയില്ലെന്ന്. എന്തുകൊണ്ടാണ് പ്രണവിനെ വിഷ് ചെയ്യാത്തത് എന്നു നിരന്തരം ചോദിച്ചുകൊണ്ടിരിക്കുന്നവർ അറിയാനാണ് ഇത്. ഞാൻ നിനക്ക് ആശംസകൾ നേർന്നിട്ടുണ്ടെന്ന് അറിയാൻ. ജന്മദിനാശംസകൾ.
ഈ ചിത്രത്തിലുള്ളതിനേക്കാൾ ഏറെ നീ വലുതായി. പക്ഷേ നീ വളരെ കൂൾ ആണെന്ന് ഞങ്ങൾ കുട്ടികൾ കരുതിയിരുന്ന കാലത്തിലേക്ക് കൂട്ടിക്കൊണ്ട് പോകാമെന്ന് കരുതി. പക്ഷേ ദൗർഭാഗ്യവശാൽ ഇത്രയും വർഷം കൊണ്ട് നമ്മൾ ഏറെ അറിവുള്ളവരായി മാറി. നിന്നെ വീണ്ടും സെറ്റിൽ കാണാൻ കാത്തിരിക്കാൻ വയ്യ.