ജീവിതം പല വിധത്തിലും തരത്തിലുമാണ് മനുഷ്യരെ പരുവപ്പെടുത്തിയെടുക്കുന്നത്. ചിലർ അതിൽ വീണുപോകും. മറ്റു ചിലർ കിട്ടുന്ന ചെറിയ കച്ചിത്തുരുമ്പും പിടിവള്ളിയാക്കും. അത്തരത്തിൽ ഇരുപത്തിയെട്ടാം വയസിൽ ഭർത്താവിനാൽ ഉപേക്ഷിക്കപ്പെട്ട് മൂന്നു കുഞ്ഞുങ്ങളുമായി പകച്ചു പോയ ഒരു ജീവിതമാണ് മഞ്ജുഷ അനുവെന്ന സ്ത്രീയുടേത്. ജീവിതതത്തിലെ സങ്കടങ്ങളും ദുരന്തങ്ങളും ഇരുപത്തിയെട്ടാം വയസിൽ മഞ്ജുഷയെ വാർധക്യത്തിലേക്ക് തള്ളിയിട്ടെങ്കിൽ നാൽപത്തിയഞ്ചാം വയസിൽ സന്തോഷത്തിന്റെ യൗവനം തിരികെ പിടിച്ചിരിക്കുകയാണ് ഇവർ. ഇവരുടെ 28 വയസിലെയും 45 വയസിലെയും ചിത്രങ്ങൾ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. 28 വയസിലെ തന്റെ ചിത്രം വാർദ്ധക്യത്തിലേതു പോലെ തോന്നിക്കുന്നത് എല്ലാം ക്ഷമിച്ചും സഹിച്ചും ഒറ്റയ്ക്കായതിന്റെ ബാക്കിയാണെന്ന് മഞ്ജുഷ പറയുന്നു. വനിത ഓൺലൈനോടാണ് മഞ്ജുഷ മനസ് തുറന്നത്.
പതിനേഴാമത്തെ വയസിൽ 1993ൽ ആയിരുന്നു മഞ്ജുഷയുടെ വിവാഹം. ഉത്തരവാദിത്തബോധമില്ലാത്ത ഭർത്താവിനെ തുടർന്ന് ജീവിതം കണ്ണീരിലായി. ഇരുപത്തിയെട്ടാമത്തെ വയസിൽ ജീവിതം വഴി പിരിയുമ്പോൾ മൂന്നു കുഞ്ഞുങ്ങളുമായി മഞ്ജുഷ തനിച്ചായി. എന്നാൽ, തോൽക്കാൻ തയ്യാറായിരുന്നില്ല. മക്കളെ വളർത്തണമെന്ന വാശി ഉള്ളിലുണ്ടായി. കയ്യിലുള്ളത് സ്വരുക്കൂട്ടി ബ്യൂട്ടീഷ്യൻ കോഴ്സ് പഠിച്ചു കോഴ്സ് സർട്ടിഫിക്കറ്റും അതിനേക്കാളും വലിയ ജീവിത പാഠങ്ങളുമായി മസ്കറ്റിലേക്ക് വണ്ടി കയറി. ഒമ്പത് വർഷം അവിടെ ജോലി ചെയ്തു. ആ സമയത്ത് ഒരു പാട് ജീവിതപാഠങ്ങൾ പഠിച്ചു. മക്കളെ നല്ല രീതിയിയൽ വളർത്തി അന്തസ്സായി വിവാഹം ചെയ്തയച്ചു.
വർഷങ്ങളുടെ പ്രവാസജീവിതം അവസാനിപ്പിച്ച് ഇപ്പോൾ നാട്ടിലെത്തിയ മഞ്ജുഷ ഇപ്പോൾ ഒരു അഡ്വൈർടൈസ്മെന്റ് കമ്പനിയിൽ ജോലി ചെയ്തു വരികയാണ്. ചില ഷോർട് ഫിലിമുകളുടെയും ഭാഗമായിട്ടുണ്ട് മഞ്ജുഷ. തന്റെ ഫോട്ടോ കണ്ട് ഈ പ്രായത്തിലും എങ്ങനെ ഇരിക്കുന്നുവെന്ന് ചോദിക്കുന്നവരുണ്ട്. ജീവിതത്തിൽ സന്തോഷമായിട്ടിരുന്നാൽ സൗന്ദര്യവും തിളക്കവും താനേ വരുമെന്ന് മഞ്ജുഷ പറഞ്ഞു. ജീവിതത്തിൽ താൻ ഒരിക്കൽ തോറ്റു പോയതാണെന്നും രണ്ടാമതൊരിക്കൽ കൂടി തനിക്കതിന് മനസില്ലായിരുന്നെന്നും മഞ്ജുഷ വ്യക്തമാക്കി.