മമ്മൂട്ടി നായകനായി എത്തിയ നന്പകല് നേരത്ത് മയക്കം എന്ന ചിത്രത്തെ പുകഴ്ത്തി സംവിധായകനും തിരക്കഥാകൃത്തും സംഗീത സംവിധായകനുമായ ശ്രീകുമാരന് തമ്പി. നടന് എന്ന നിലയിലും നിര്മ്മാതാവ് എന്ന നിലയിലും മമ്മൂട്ടി ഏറ്റവും ഉയര്ന്ന നിലയില് എത്തിയിരിക്കുന്നുവെന്ന് ശ്രീകുമാരന് തമ്പി ഫേസ്ബുക്കില് കുറിച്ചു. മമ്മൂട്ടിയുടെ അഭിനയം അന്തര്ദേശീയ നിലവാരം പുലര്ത്തുന്നതാണ്. ലിജോ ജോസ് പല്ലിശ്ശേരി ഒരു ജീനിയസ് ആണ്. ഈ ചെറുപ്പക്കാരന് ഉയരങ്ങള് കീഴടക്കാനിരിക്കുന്നതേയുള്ളൂ. അമ്പത്തേഴ് വര്ഷം സിനിമയ്ക്ക് വേണ്ടി ജീവിതം ചിലവാക്കിയ തന്നെ അദ്ഭുതപ്പെടുത്തിയ അപൂര്വം ചിത്രങ്ങളിലൊന്നാണ് നന്പകല് നേരത്ത് മയക്കമെന്നും ശ്രീകുമാരന് തമ്പി കൂട്ടിച്ചേര്ത്തു.
മമ്മൂട്ടിയും ലിജോ ജോസ് പെല്ലിശ്ശേരിയും ആദ്യമായി ഒന്നിച്ചെത്തിയ ചിത്രമാണ് നന്പകല് നേരത്ത് മയക്കം. ജെയിംസ് എന്ന കഥാപാത്രത്തെയാണ് മമ്മൂട്ടി ചിത്രത്തില് അവതരിപ്പിച്ചിരിക്കുന്നത്. പ്രേക്ഷകര്ക്ക് തീര്ത്തും വേറിട്ട ഒരു ചലച്ചിത്ര അനുഭവമാണ് ചിത്രം സമ്മാനിച്ചിരിക്കുന്നത്. മമ്മൂട്ടിയുടെ കരിയറിലെ ഏറ്റവും മികച്ച അഞ്ച് കഥാപാത്രങ്ങളെ തിരഞ്ഞെടുത്താല് അതില് ഒന്ന് നന്പകല് നേരത്ത് മയക്കത്തിലെ ജയിംസ് എന്ന കഥാപാത്രവും തീര്ച്ചയായും ഇടംപിടിക്കും. മമ്മൂട്ടി കമ്പനി ആദ്യമായി നിര്മിച്ച ചിത്രമാണ് നന്പകല് നേരത്ത് മയക്കം. ദുല്ഖര് സല്മാന്റെ വേഫേറെര് ഫിലിംസ് ആണ് ചിത്രം തീയറ്ററുകളില് എത്തിച്ചിരിക്കുന്നത്. ട്രൂത്ത് ഫിലിംസാണ് ഓവര്സീസ് റിലീസ് നടത്തുന്നത്.
രമ്യാ പാണ്ട്യന്, അശോകന്, കൈനകരി തങ്കരാജ്, സുരേഷ് ബാബു, ചേതന് ജയലാല്, അശ്വന്ത് അശോക് കുമാര്, രാജേഷ് ശര്മ്മ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. തേനി ഈശ്വറാണ് ചിത്രത്തിന്റെ ഛായാഗ്രഹണം. എഡിറ്റിംഗ് നിര്വഹിച്ചിരിക്കുന്നത് ദീപു എസ്. ജോസഫ്. ലിജോ ജോസ് പെല്ലിശ്ശേരിയുടെ കഥക്ക് തിരക്കഥയും സംഭാഷണവും ഒരുക്കിയത് എസ്. ഹരീഷാണ്. ഡിജിറ്റല് മാര്ക്കറ്റിംഗ് വിഷ്ണു സുഗതന്, അനൂപ് സുന്ദരന്, പിആര്ഒ- പ്രതീഷ് ശേഖര്.