റെക്കോർഡുകൾ എന്നും ഭേദിക്കപ്പെടാൻ ഉള്ളതാണ്. പുതിയ ചരിത്രങ്ങൾ എന്നും എഴുതപ്പെട്ടുകൊണ്ടിരിക്കും. അതാണ് ലാലേട്ടൻ ചിത്രം ഒടിയനും ഇപ്പോൾ തെളിയിച്ചുകൊണ്ടിരിക്കുന്നത്. ഇപ്പോഴിതാ പുതിയൊരു റെക്കോർഡും കൂടി ഒടിയന്റെ പേരിൽ കുറിക്കപ്പെട്ടിരിക്കുന്നു. കൊച്ചി മൾട്ടിപ്ലെക്സിൽ ആദ്യദിനം 20 ലക്ഷം കളക്ഷൻ നേടുന്ന ആദ്യ മലയാളചിത്രം എന്ന ബഹുമതി സ്വന്തമാക്കിയിരിക്കുകയാണ് ഒടിയൻ ഇപ്പോൾ. ആദ്യ ദിനം 19.12 ലക്ഷം നേടിയ കായംകുളം കൊച്ചുണ്ണിയുടെ റെക്കോർഡ് തകർത്തു കൊണ്ടാണ് ഒടിയൻ ഈ നേട്ടം കൈവരിച്ചിരിക്കുന്നത്. അതിലും വലിയ പ്രത്യേകത എന്താണെന്ന് വെച്ചാൽ അഡ്വാൻസ് ബുക്കിങ്ങിലൂടെ മാത്രമാണ് ഈ റെക്കോർഡ് ഒടിയൻ കൈവരിച്ചിരിക്കുന്നത്. 66 ഷോകളാണ് ആദ്യദിനം കൊച്ചി മൾട്ടിപ്ലെക്സിൽ ഒടിയനായി ചാർട്ട് ചെയ്യപ്പെട്ടിരിക്കുന്നത്. അതിൽ തന്നെ ഒട്ടുമിക്ക ഷോകളുടെയും ടിക്കറ്റുകൾ പൂർണമായും വിറ്റഴിഞ്ഞു. 21 ലക്ഷമാണ് ഒടിയൻ ഇതുവരെ കൊച്ചി മൾട്ടിപ്ലെക്സിൽ നിന്നും കരസ്ഥമാക്കിയിരിക്കുന്നത്.