വിനീത് ശ്രീനിവാസൻ ചിത്രങ്ങൾ എല്ലാം തന്നെ മനോഹരമായ ഗാനങ്ങളാൽ എന്നും സമ്പന്നമാണ്. അതുകൊണ്ട് തന്നെ പ്രേക്ഷകർ ആ ചിത്രങ്ങളേയും ഗാനങ്ങളേയും എന്നും നെഞ്ചേറ്റാറുണ്ട്. ഹൃദയത്തിന്റെ കാര്യവും വ്യത്യസ്ഥമല്ല. ഇതിനകം പുറത്തിറങ്ങിയ ദർശന അടക്കമുള്ള ഗാനങ്ങൾ സൂപ്പർഹിറ്റാണ്. മലയാളികളുടെ എക്കാലത്തെയും മികച്ച കൂട്ടുകെട്ടുകളിൽ ഒന്നാണ് മോഹൻലാൽ – പ്രിയദർശൻ – ശ്രീനിവാസൻ സംഘം. ഇപ്പോഴിതാ അടുത്ത തലമുറയും ഒരുമിച്ചെത്തിയിരിക്കുകയാണ്. ശ്രീനിവാസന്റെ മകൻ വിനീത് ശ്രീനിവാസൻ, പ്രിയദർശന്റെ മകൾ കല്യാണി പ്രിയദർശൻ, മോഹൻലാലിന്റെ മകൻ പ്രണവ് മോഹൻലാൽ എന്നിവർ ഒന്നിച്ചെത്തുന്ന സിനിമയാണ് ഹൃദയം. സിനിമ പ്രഖ്യാപിച്ചപ്പോൾ മുതൽ തന്നെ സിനിമാപ്രേമികൾ ഈ സിനിമയുടെ ഓരോ പുതിയ വിശേങ്ങൾക്കുമായി കാത്തിരിക്കുകയാണ്.
പ്രേക്ഷകർ ആകാംക്ഷയോടെ കാത്തിരുന്ന ഹൃദയത്തിലെ ദർശന എന്ന ഗാനം ഇപ്പോഴും ട്രെൻഡിങ്ങ് ലിസ്റ്റിൽ മുൻപന്തിയിലാണ്. പ്രണവ് മോഹൻലാൽ, ദർശന രാജേന്ദ്രൻ എന്നിവരാണ് ‘ദർശന’ പാട്ടിൽ പ്രത്യക്ഷപ്പെടുന്നത്. മെരിലാൻഡ് സിനിമാസ് നിർമിക്കുന്ന സിനിമയുടെ കഥയും സംവിധാനവും വിനീത് ശ്രീനിവാസൻ ആണ്. അരുൺ ആലാട്ടിന്റെ വരികൾക്ക് ഹെഷം അബ്ദുൾ വഹാബ് ആണ് സംഗീതം നൽകിയിരിക്കുന്നത്. ഹെഷം അബ്ദുൾ വഹാബ്, ദർശന രാജേന്ദ്രൻ എന്നിവരാണ് പാട്ട് പാടിയിരിക്കുന്നത്. ജനുവരിയിലാണ് ചിത്രം തീയറ്ററുകളിൽ എത്തുന്നത്.
ഇപ്പോഴിതാ ചിത്രത്തിലെ പുതിയൊരു ഗാനം പുറത്തിറങ്ങിയിരിക്കുകയാണ്. ‘ഒണക്കമുന്തിരി’ എന്ന ഈ പുതിയ ഗാനം ഹൃദയത്തിന് വേണ്ടി വിനീത് ശ്രീനിവാസൻ രചിച്ച ഏക ഗാനമാണ്. ഹിഷാം അബ്ദുൾ വഹാബാണ് സംഗീതം. വിനീതിന്റെ സഖി ദിവ്യയാണ് ഗാനം ആലപിച്ചിരിക്കുന്നത്. പ്രണവും കല്യാണിയുമാണ് ഗാനത്തിൽ പ്രത്യക്ഷപ്പെടുന്നത്.