2002ൽ ഫൈവ് സ്റ്റാർ എന്ന തമിഴ് ചിത്രത്തിലൂടെ അഭിനയരംഗത്ത് അരങ്ങേറ്റം കുറിച്ച കനിഹ എന്ന ദിവ്യ വെങ്കട്ടസുബ്രഹ്മണ്യം മലയാളം, തെലുങ്ക് കന്നഡ ഭാഷകളിലായി നിരവധി ചിത്രങ്ങളിൽ അഭിനയിച്ചു കഴിഞ്ഞു. മെക്കാനിക്കൽ എഞ്ചിനീറിങ്ങിൽ ബിരുദധാരിയായ കനിഹ മികച്ചൊരു പോപ് സിങ്ങർ കൂടിയാണ്. മോഡലിംഗ് രംഗത്ത് നിന്നുമാണ് അഭിനയ രംഗത്തേക്ക് വന്നത്. അവതാരകയായും കനിഹ തിളങ്ങിയിട്ടുണ്ട്. അജിത്, മമ്മൂട്ടി, മോഹൻലാൽ, ജയറാം, സുദീപ് തുടങ്ങി നിരവധി സൂപ്പർ താരങ്ങൾക്കൊപ്പം അഭിനയിച്ചിട്ടുള്ള കനിഹക്ക് തനിക്ക് ഹൃദയത്തോട് ചേർന്ന് നിൽക്കുന്ന കഥാപാത്രം മമ്മൂട്ടി നായകനായ പഴശിരാജയിലെ കൈതേരി മാക്കം എന്ന കഥാപാത്രമാണ്.
കനിഹ തന്നെയാണ് ഇക്കാര്യം വ്യക്തമാക്കിയത്. തന്റെ ജീവിതത്തേക്കാൾ വലുതായിരുന്നു ആ ചിത്രമെന്നും ഒരു പുതിയ ഇൻഡസ്ട്രി തനിക്കായി തുറന്നു തന്ന ചിത്രമാണ് അതെന്നും കനിഹ പറയുന്നു. ഇതിഹാസതുല്യരായ പലരിൽ നിന്നും പാഠങ്ങൾ പഠിക്കുവാൻ സാധിച്ച പഴശ്ശിരാജ മലയാള സിനിമയിലെ എന്ന പോലെ തന്നെ തന്റെ കരിയറിലെയും നാഴികക്കല്ലാണ് എന്നും നടി കൂട്ടിച്ചേർത്തു.
2009ൽ പുറത്തിറങ്ങിയ പഴശ്ശിരാജ, ബ്രിട്ടീഷ് മേൽക്കോയ്മക്ക് എതിരെ പട വെട്ടിയ പഴശ്ശിരാജയുടെ ജീവിതത്തെ അധികരിച്ച് ഹരിഹരൻ സംവിധാനം നിർവഹിച്ച ചിത്രമാണ്. എം ടി വാസുദേവൻ നായരാണ് തിരക്കഥ രചിച്ചത്. മമ്മൂട്ടിയെ കൂടാതെ മനോജ് കെ ജയൻ, കനിഹ, ശരത് കുമാർ, പദ്മപ്രിയ, തിലകൻ, ജഗതി ശ്രീകുമാർ തുടങ്ങിയവരും ചിത്രത്തിൽ കേന്ദ്രകഥാപാത്രങ്ങളെ അവതരിപ്പിച്ചിരിക്കുന്നു.