Wednesday, December 11

നിഷിദ്ധമായ അടവിന്റെ അനിവാര്യമായ പ്രയോഗം | പൂഴിക്കടകൻ റിവ്യൂ

Google+ Pinterest LinkedIn Tumblr +
Loading...
“Asif”

കളരിയിൽ നിഷിദ്ധമായ അടവാണ് ചതി പ്രയോഗമായ പൂഴിക്കടകൻ. അത് കൊണ്ട് തന്നെ ഗുരുക്കന്മാരാരും ശിഷ്യരെ പൂഴി കടകൻ പഠിപ്പിക്കുവാൻ മുതിരാറുമില്ല. മറ്റു നിർവാഹമില്ലാത്ത അവസ്ഥയിൽ ഒരിക്കലും ദുരുപയോഗം ചെയ്യുകയോ, സ്വന്തം ജീവരക്ഷക്ക് വേണ്ടിയല്ലാതെ പ്രയോഗിക്കുകയില്ലെന്ന് സത്യം ചെയ്യിച്ചിട്ടേ ഈ അടവ് പഠിപ്പിക്കുകയുള്ളു. വാൾപയറ്റിനിടയിൽ കാൽ പാദം കൊണ്ട് മണ്ണ് കോരി എതിരാളിയുടെ കണ്ണിലടിക്കുകയും, കണ്ണ് മൂടിപ്പോകുന്ന അവസ്ഥയിൽ എതിരാളിയെ വെട്ടി വീഴ്ത്തുകയും ചെയ്യുന്നതാണ് പൂഴിക്കടകൻ. അവസാന അടവ് എന്ന നിലയിൽ പ്രസിദ്ധിയാർജ്ജിച്ച ആ അടവിന്റെ പേരിലുള്ള ചിത്രവുമായാണ് നവാഗതനായ ഗിരീഷ് നായർ എത്തിയിരിക്കുന്നത്. സാമൂഹിക പ്രതിബദ്ധതയുള്ള ഒരു വിഷയം തന്നെയാണ് ചിത്രത്തിന്റെ ഇതിവൃത്തം.

പട്ടാളക്കാരനായ സാമുവൽ അവധി ചിലവഴിക്കുവാൻ നാടായ ചെറുതോണിയിലേക്ക് എത്തുകയാണ്. ഭാര്യക്കും അമ്മക്കും മകനുമൊപ്പം സന്തോഷകരമായ ദിവസങ്ങൾ പിന്നിടുമ്പോഴാണ് ഒരു സാമൂഹിക പ്രശ്നത്തിൽ സാമുവൽ ഇടപെടുന്നത്. അത് അയാളുടെ അത് വരെയുള്ള ജീവിതത്തെ തന്നെ മാറ്റിമറിക്കുകയാണ്. രാഷ്ട്രീയ പാർട്ടികളുടെ തമ്മിൽതല്ലലും ക്വാറി ഉടമകളുടെ സ്ഥലം കൈയ്യേറ്റ ശ്രമങ്ങളും റോഡുകളുടെ ശോചനീയ അവസ്ഥയുമെല്ലാം ചിത്രത്തിൽ ചർച്ച ചെയ്യപ്പെടുന്നുണ്ട്. അഴിമതി നിറഞ്ഞ ഭരണകൂടത്തിനെതിരെ ഒറ്റയാൾ പോരാട്ടത്തിന് ഇറങ്ങുന്ന സാമുവലിന് കളക്ടറുടെ പിന്തുണയും കൂടിയുണ്ട്.

Loading...

ഭരണകൂടത്തിനെതിരെയുള്ള ഒറ്റയാൾ പോരാട്ടങ്ങൾ നിറഞ്ഞ നിരവധി ചിത്രങ്ങൾ മലയാളികൾ കണ്ടിട്ടുണ്ട്. ഈ മ യൗ , ജല്ലിക്കെട്ട്, പൊറിഞ്ചു മറിയം ജോസ് തുടങ്ങിയ ചിത്രങ്ങളിൽ തകർത്തഭിനയിച്ച ചെമ്പൻ വിനോദിനെ നായകനാക്കി അത്തരത്തിൽ ഒരു ചിത്രം എത്തിയപ്പോൾ പ്രതീക്ഷകൾ ഏറെയായിരുന്നു. പക്ഷേ ആ പ്രതീക്ഷകൾക്ക് ഒപ്പം ചിത്രമെത്തിയോ എന്നതും ഒരു ചോദ്യചിഹ്നമാണ്. ജയസൂര്യ അവതരിപ്പിച്ച ഐ എ എസ് കഥാപാത്രത്തിന് യഥാർത്ഥ ജീവിതത്തിൽ ഉള്ള ആളുമായി ഒരു സാമ്യം തോന്നിയതും അത് അത്ര പോസിറ്റീവ് അല്ലാത്തൊരു കാര്യമായതും ചിത്രത്തിന് നെഗറ്റീവായി പരിണമിച്ചേക്കാം. ധന്യ ബാലകൃഷ്ണ, അലൻസിയർ, സുധി കോപ്പ, മാല പാർവതി, ബാലു വർഗീസ് തുടങ്ങിയവരും അവരുടെ റോളുകൾ അവരാൽ കഴിയുന്ന വിധത്തിൽ മനോഹരമാക്കുവാൻ ശ്രമിച്ചിട്ടുണ്ട്.

ഉണ്ണി മലയിലിന്റെ കഥ തിരക്കഥയാക്കിയിരിക്കുന്നത് ഗിരീഷും ഹരി പ്രസാദ് കൊലെരിയും ചേർന്നാണ്. ബിജിപാൽ ഒരുക്കിയ ഗാനങ്ങളിൽ പൊൻവെയിലിന് കസവായി എന്ന വിജയ് യേശുദാസും ആൻ ആമിയും ചേർന്നാലപിച്ച ഗാനം എടുത്തു പറയേണ്ടതാണ്. ഷ്യാൽ സതീഷാണ് ക്യാമറ കൈകാര്യം ചെയ്‌തിരിക്കുന്നത്‌. സാമൂഹിക പ്രതിബദ്ധതയുള്ള ഒരു വിഷയം ഉള്ളത് കൊണ്ട് തന്നെ പൂഴിക്കടകൻ ശ്രദ്ധേയമാണ്.

“Lucifer”
Share.

About Author

Comments are closed.