മോഹന്ലാലിനെ നായകനാക്കി പൃഥ്വിരാജ് സംവിധാനം ചെയ്ത ലൂസിഫറിന്റെ രണ്ടാം ഭാഗമാണ് എമ്പുരാന്. ചിത്രം പ്രഖ്യാപിച്ചതു മുതല് കാത്തിരിപ്പിലായിരുന്നു മോഹന്ലാല് ആരാധകര്. ഇപ്പോഴിതാ ചിത്രത്തിന്റെ ഷൂട്ടിംഗ് ആരംഭിക്കുകയാണെന്ന് വ്യക്തമാക്കി രംഗതത്തെത്തിയിരിക്കുകയാണ് പൃഥ്വിരാജ്. മോഹന്ലാലിനും മുരളി ഗോപിക്കും ആന്റണി പെരുമ്പാവൂരിനുമൊപ്പമെത്തിയാണ് പൃഥ്വിരാജ് കാര്യങ്ങള് വിശദീകരിച്ചത്. ഇതിന്റെ വിഡിയോയും പുറത്തുവിട്ടു.
ലൂസിഫറിന് മുന്നോടിയായി 2018 ല് മോഹന്ലാലുമായി കൂടിക്കാഴ്ച നടത്തിയിരുന്നുവെന്നും അന്ന് ഒടിയന്റെ സെറ്റില്വച്ചാണ് ലൂസിഫറിന് ഔദ്യോഗികമായി തുടക്കം കുറിച്ചതെന്നും പൃഥ്വിരാജ് പറഞ്ഞു. അതുപോലെയൊരു കൂടിക്കാഴ്ചയാണ് നടന്നിരിക്കുന്നത്. എമ്പുരാന്റെ കഥ പൂര്ത്തിയായി. ഇനി കാസ്റ്റിംഗും മറ്റുമുള്ള കാര്യങ്ങളും തുടങ്ങുകയാണ്. ലൂസിഫര് പോലെ ഒരു കൊമേഷ്യല് എന്റര്ടെയ്നറായിരിക്കും എമ്പുരാന്. ലൂസിഫറിനെ സ്വീകരിച്ച പോലെ എമ്പുരാനെയും പ്രേക്ഷകര് സ്വീകരിക്കുമെന്നാണ് കരുതുന്നതെന്നും പൃഥ്വിരാജ് പറഞ്ഞു.
ലൂസിഫറിന് മൂന്നാം ഭാഗമുണ്ടാകുമെന്ന സൂചന മുരളി ഗോപി നല്കി. മൂന്ന് ഭാഗങ്ങളുള്ള ഒരു ചിത്രത്തിന്റെ രണ്ടാം ഭാഗമാണ് എമ്പുരാനെന്നാണ് മുരളി ഗോപി പറഞ്ഞത്. ലൂസിഫറിനെ വച്ച് നോക്കുമ്പോള് എമ്പുരാന് അതിന് മുകളില് നില്ക്കണമെന്നും അങ്ങനെ സംഭവിക്കുമെന്ന് പ്രതീക്ഷിക്കുന്നുവെന്നും മോഹന്ലാല് പറഞ്ഞു. ലൂസിഫറിന്റെ കഥ എമ്പുരാനില് നില്ക്കില്ലെന്നും അതിന് ശേഷം എന്ത് എന്ന് പ്രേക്ഷകര് ചോദിക്കുമെന്നും മോഹന്ലാല് പറഞ്ഞു.