ബോളിവുഡ് താരം രൺവീർ സിംഗ് നായകനായി എത്തുന്ന ചിത്രം ’83’ റിലീസിന് എത്തി. മലയാളത്തിൽ പൃഥ്വിരാജ് ആണ് ഈ ചിത്രം അവതരിപ്പിക്കുന്നത്. രൂപം കൊണ്ടും വേഷം കൊണ്ടും കപിൽ ദേവ് ആയി രൺവീർ സിംഗ് സ്ക്രീനിൽ നടത്തുന്ന പരകായ പ്രവേശം ഗംഭീരമാണെന്നാണ് റിപ്പോർട്ടുകൾ. ചിത്രം സംവിധാനം ചെയ്യുന്നത് കബീർ ഖാൻ ആണ്.
ചിത്രത്തിന്റെ പ്രത്യേക പ്രീമിയർ ഷോ മലയാളസിനിമയിലെ താരങ്ങൾക്കായി പൃഥ്വിരാജ് കൊച്ചിയിൽ നടത്തിയിരുന്നു. നസ്രിയ, വിജയ് ബാബു, അമല പോൾ, സാനിയ ഇയ്യപ്പൻ, സംയുക്ത മേനോൻ തുടങ്ങി നിരവധി പേർ സിനിമ കാണാനായി എത്തിയിരുന്നു. സിനിമ കണ്ടിറങ്ങിയതിനു ശേഷം സിനിമയെക്കുറിച്ചുള്ള അഭിപ്രായം താരങ്ങൾ മാധ്യമങ്ങളുമായി പങ്കുവെയ്ക്കുകയും ചെയ്തു.
‘സിനിമ കണ്ടിറങ്ങിയതേ ഒള്ളൂ. നല്ല സിനിമയാണ്. മികച്ച കലാസൃഷ്ടി കണ്ടതിന്റെ അനുഭവം സിനിമ പ്രേക്ഷകർക്ക് കിട്ടും. ക്രിക്കറ്റ് പ്രേമികൾക്ക് ഇന്ത്യൻ ക്രിക്കറ്റ് ചരിത്രത്തിന്റെ നാഴികക്കല്ലായ സംഭവത്തിലേക്ക് ഒരു തിരിഞ്ഞു നോട്ടമാകും. സിനിമയും ക്രിക്കറ്റും ഇഷ്ടപ്പെടുന്നവർ തീർച്ചയായും ഈ ചിത്രം തിയറ്ററുകളിൽ തന്നെ കാണണം. ഞാന് അങ്ങനെയൊരാളാണ്. എനിക്കൊരുപാട് ഇഷ്ടപ്പെട്ടു.’ – ചിത്രം കണ്ടതിനു ശേഷം മാധ്യമങ്ങളോട് സംസാരിക്കവെ പൃഥ്വിരാജ് പറഞ്ഞു. മാധ്യമങ്ങളോട് സംസാരിച്ച് പൂർത്തിയാക്കി മടങ്ങിയ പൃഥ്വിരാജിനെ അപ്രതീക്ഷിതമായി എത്തിയ നസ്രിയ തള്ളിക്കൊണ്ട് വീണ്ടും മാധ്യമങ്ങളുടെ മുന്നിലേക്ക് എത്തി. പൃഥ്വിരാജിനെ പിടിച്ചു നിർത്തിക്കൊണ്ട് എല്ലാവരും സിനിമ കാണണമെന്ന് നസ്രിയ അഭ്യർത്ഥിച്ചു. നിറഞ്ഞ ചിരിയോടെയാണ് കണ്ടു നിന്നവർ ഈ രംഗങ്ങളെ വരവേറ്റത്. ഏതായാലും ഇത് സോഷ്യൽ മീഡിയയിൽ വൈറലായി മാറിയിരിക്കുകയാണ്.