മകളും നടിയുമായ കല്യാണിക്കൊപ്പം പൊതുവേദി പങ്കിട്ട് സംവിധായകന് പ്രിയദര്ശന്. ഒരച്ഛന് മകള്ക്കൊപ്പം വേദി പങ്കിടുന്നതിലും വലുതായി ഒന്നുമില്ലെന്ന് പ്രിയദര്ശന് പറഞ്ഞു. ഇതുപോലെ ഒരു വേദിയിലിരിക്കുമെന്ന് ഒരിക്കലും കരുതിയില്ല. അവള് സിനിമയില് അഭിനയിക്കുമെന്നും പ്രതീക്ഷിച്ചിരുന്നില്ലെന്നും പ്രിയദര്ശന് പറഞ്ഞു. തൃശൂര് പൂങ്കുന്നം സീതാരാമസ്വാമി ക്ഷേത്രത്തിലെ സംഗീതോത്സവത്തിന്റെ ഉദ്ഘാടനത്തിനായിരുന്നു പ്രിയദര്ശനും കല്യാണിയും ഒരുമിച്ച് ആദ്യമായി പൊതുവേദിയിലെത്തിയത്.
സെറ്റില് വന്നാല് പെട്ടെന്ന് മടങ്ങുന്ന പ്രകൃതക്കാരിയായിരുന്നു കല്യാണി. ഒരിക്കല് പോലും അവള് തന്നോട് സിനിമയെക്കുറിച്ച് സംസാരിച്ചിട്ടില്ല. അമേരിക്കയില് ആര്ക്കിടെക്ട് ബിരുദത്തിന് പഠിക്കാന് പോയപ്പോള് കല്യാണി അത് നന്നായി ചെയ്തു. ഇനി എന്തുചെയ്യുമെന്ന് താന് ചോദിച്ചിട്ടില്ല. അതിനിടെയാണ് തന്നെ അത്ധുതപ്പെടുത്തി നാഗാര്ജുനയുടെ സിനിമയില് അഭിനയിക്കട്ടെ എന്ന് ചോദിച്ചത്. സര്വ ദൈവങ്ങളേയും വിളിച്ചാണ് അതിന് സമ്മതിച്ചത്. പരാജയപ്പെട്ടാല് തന്നേക്കാള് വേദനിക്കുന്നത് അവളായിരിക്കും. പക്ഷേ അവള് നന്നായി ചെയ്തുവെന്നും പ്രിയദര്ശന് കൂട്ടിച്ചേര്ത്തു.
പ്രിയദര്ശന് ഇനി ഒരിക്കല് കല്യാണിയുടെ അച്ഛന് എന്ന പേരില് അറിയപ്പെടുമെന്നായിരുന്നു ചടങ്ങില് പങ്കെടുത്ത കല്യാണ് സില്ക്സ് ചെയര്മാന് ടി.എസ് പട്ടാഭിരാമന് പറഞ്ഞത്. പ്രിയദര്ശനെന്നല്ല ഏത് അച്ഛനും അതായിരിക്കും സന്തോഷം. ആ ദിനം വരട്ടെയെന്നും പട്ടാഭിരാമന് പറഞ്ഞു.