അടിപൊളി ഐറ്റം ഡാൻസുമായി എത്തി ആരാധകരെ അമ്പരപ്പിച്ച് നടി റായ് ലക്ഷ്മി. അടുത്തിടെ പുറത്തിറങ്ങിയ ഒരു മ്യൂസിക് വീഡിയോയിലാണ് മലയാളി പ്രേക്ഷകർ സ്നേഹത്തോടെ ലക്ഷ്മി റായി എന്നു വിളിക്കുന്ന റായ് ലക്ഷ്മി പ്രത്യക്ഷപ്പെട്ടിരിക്കുന്നത്. വീഡിയോയിൽ റായ് ലക്ഷ്മി കുതിരപ്പുറത്തു പോകുന്ന ഒരു രംഗമുണ്ട്. അതാണ് ആരാധകരുടെ ഇടയിൽ ഇപ്പോൾ വൈറലായിരിക്കുന്നത്.
പായൽ ദേവ് മ്യൂസിക് ചെയ്ത വീഡിയോയിൽ റായ് ലക്ഷ്മിക്കൊപ്പം പവൻ സിംഗ്, മൊഹ്സിൻ ഷെയ്ഖ്, പായൽ ദേവ് എന്നിവരും പ്രത്യക്ഷപ്പെടുന്നുണ്ട്. പവൻ സിംഗും പായൽ ദേവും ചേർന്നാണ് ഗാനം ആലപിച്ചിരിക്കുന്നത്. മൊഹ്സിൻ ഷെയ്ഖ്, പായൽ ദേവ് എന്നിവരുടേതാണ് വരികൾ. ആദിത്യ ദേവ് ആണ് മ്യൂസിക് പ്രൊഡ്യൂസർ. മുന്ദാസർ ഖാൻ ആണ് സംവിധാനവും നൃത്തസംവിധാനവും.
1989 മെയ് അഞ്ചിന് കർണാടകത്തിലെ ബൽഗാമിൽ ജനിച്ച റായ് ലക്ഷ്മി പതിനാറാം വയസിൽ അഭിനയരംഗത്തേക്ക് എത്തിയത്. ആദ്യകാലങ്ങളിൽ പരസ്യ ചിത്രങ്ങളിലെ മോഡൽ ആയിരുന്നു റായ് ലക്ഷ്മി. 2005ൽ തമിഴിലെ കർക കസദര എന്ന ചിത്രത്തിലാണ് ആദ്യം അഭിനയിച്ചത്. മലയാളത്തിൽ ലക്ഷ്മി റായിയുടെ ചിത്രങ്ങൾ പ്രേക്ഷകശ്രദ്ധ നേടിയിരുന്നു. മലയാളത്തിൽ അണ്ണൻതമ്പി, ചട്ടമ്പിനാട് തുടങ്ങിയ ചിത്രങ്ങളിൽ മമ്മൂട്ടിയോടൊപ്പം അഭിനയിച്ച ലക്ഷ്മി മോഹൻലാലിനൊപ്പം റോക്ക് ആൻഡ് റോൾ, ക്രിസ്ത്യൻബ്രദേഴ്സ്, കാസനോവ എന്നീ ചിത്രങ്ങളിൽ അഭിനയിച്ചു. മലയാളത്തിൽ രാജാധിരാജയിലാണ് ലക്ഷ്മി റായ് അവസാനമായി അഭിനയിച്ചത്.