മലയാളികളെ നിർത്താതെ പൊട്ടിച്ചിരിപ്പിച്ച നിരവധി സൂപ്പർഹിറ്റ് സിനിമകൾ മലയാളികൾക്ക് സമ്മാനിച്ച കൂട്ടുകെട്ടാണ് സിദ്ധിഖ് – ലാലിന്റേത്. രാംജി റാവു സ്പീക്കിങ്, ഇൻ ഹരിഹർ നഗർ, ഗോഡ്ഫാദർ, വിയറ്റ്നാം കോളനി, കാബൂളിവാല എന്നീ ചിത്രങ്ങൾ മലയാളികൾക്ക് സമ്മാനിച്ച ഇരുവരും അവസാനമായി ഒന്നിച്ചത് ദിലീപ് ചിത്രം കിംഗ് ലയറിന് വേണ്ടിയാണ്. ആ ചിത്രത്തിന്റെ തിരക്കഥ ഇരുവരും ഒന്നിച്ചാണ് എഴുതിയത്.
സംവിധാനം ലാലും നിർവഹിച്ചു. മോഹൻലാലിനെ നായകനാക്കി ഒരുക്കിയ ബിഗ് ബ്രദറാണ് സിദ്ധിഖിന്റെ അവസാനം പുറത്തിറങ്ങിയ ചിത്രം. സുനാമിയാണ് ലാലിൻറെ സംവിധാനത്തിൽ അവസാനം പുറത്തിറങ്ങിയ ചിത്രം.
ഇപ്പോഴിതാ വീണ്ടും ഇരുവരും ഒന്നിച്ചിരിക്കുകയാണ്. പക്ഷേ സിനിമക്ക് വേണ്ടിയല്ല ഇരുവരും വീണ്ടും ഒന്നിച്ചതെന്ന് മാത്രം. പാരിസൺസ് ലിബർട്ടി സൺഫ്ളവർ ഓയിലിന്റെ പരസ്യത്തിന് വേണ്ടിയാണ് ആ വിജയ കൂട്ടുകെട്ട് വീണ്ടും ഒന്നിച്ചിരിക്കുന്നത്. സിദ്ധിഖ് സംവിധാനം നിർവഹിച്ചിരിക്കുന്ന പരസ്യത്തിലാണ് ലാൽ അഭിനയിച്ചിരിക്കുന്നത്. ലാലിനെ കൂടാതെ ഹരീഷ് കണാരൻ, രാജേഷ് മാധവൻ എന്നിവരാണ് അഭിനയിച്ചിരിക്കുന്നത്. അറബിയായി എത്തിയിരിക്കുന്നത് ജയസൂര്യയുടെ വെള്ളം, സണ്ണി വെയ്ന്റെ അപ്പൻ തുടങ്ങിയ ചിത്രങ്ങളുടെ നിർമ്മാതാവായ രഞ്ജിത് മണബ്രക്കാട്ടാണ്.