താൻ ഒരുപാട് ബഹുമാനിക്കുന്ന ഒരു വ്യക്തിത്വമാണ് ശൈലജ ടീച്ചറെന്ന് തമിഴ് നടൻ സൂര്യ. സൂര്യയുടെ റിലീസിനൊരുങ്ങുന്ന ‘എതര്ക്കും തുനിന്തവന്’ എന്ന ചിത്രത്തിന്റെ പ്രചാരണവുമായി ബന്ധപ്പെട്ട് കൊച്ചിയിൽ എത്തിയ താരം മാധ്യമപ്രവര്ത്തകരോട് സംസാരിക്കുമ്പോൾ ആയിരുന്നു ഇങ്ങനെ പറഞ്ഞത്. സ്ത്രീകൾക്ക് ലോകത്ത് എവിടെയും അവരുടേതായ സ്ഥാനം ഉറപ്പിക്കാം എന്ന് കാണിച്ചു തരുകയാണ് ശൈലജ ടീച്ചറും ആര്യ രാജേന്ദ്രനുമെന്നും സൂര്യ വ്യക്തമാക്കി.
കേരളവും ഇവിടുത്തെ സമൂഹവും അതിന് വഴി ഒരുക്കുകയാണ്. ജയ് ഭീം സിനിമ കണ്ട് ശൈലജ ടീച്ചർ തന്നെ വിളിച്ചിരുന്നു. താൻ ഒരുപാട് ബഹുമാനിക്കുന്ന വ്യക്തിത്വമാണ് ശൈലജ ടീച്ചർ. സിനിമ കണ്ട് ടീച്ചർ വിളിച്ചത് തനിക്ക് ലഭിച്ച വലിയ അംഗീകാരമാണെന്നും സൂര്യ പറഞ്ഞു. താൻ ഒരിക്കലും പ്രതീക്ഷിക്കാത്തത് ആണ് സംഭവിച്ചതെന്നും തനിക്കും തന്റെ ടീമിനും കിട്ടിയ വലിയ അംഗീകാരമായിരുന്നു ടീച്ചറുടെ വിളിയെന്നും താരം പറഞ്ഞു. കേരളത്തിലെ കുട്ടികളോട് ഏത് ടീച്ചറെയാണ് ഇഷ്ടം എന്ന് ചോദിച്ചാൽ മലർ ടീച്ചർ എന്നാവും ഉത്തരം. എന്നാൽ തനിക്കിഷ്ടം ശൈലജ ടീച്ചറെയാണ്. ഒരു സൂപ്പര്സ്റ്റാര് ആയി താൻ നോക്കിക്കാണുന്ന ഒരാളാണ് ശൈലജ ടീച്ചറെന്നും സൂര്യ പറഞ്ഞു.
സ്ത്രീകള്ക്ക് പ്രചോദനം നല്കുന്ന ഒരു സംസ്ഥാനത്തു വന്ന് നിങ്ങളെ എല്ലാവരെയും കാണാന് കഴിഞ്ഞതില് വലിയ സന്തോഷമുണ്ടെന്നും സമൂഹത്തെ നയിക്കുന്നതിലും, മികച്ച സിനിമ ചെയ്യുന്നതിലും കേരളം ഒരു മാതൃകയാണെന്നും സൂര്യ പറഞ്ഞു. സണ് പിക്ചര്സിന്റെ നിര്മാണത്തില് പാണ്ഡിരാജ് സംവിധാനം ചെയ്യുന്ന ചിത്രമാണ് ‘എതര്ക്കും തുനിന്തവന്’. പ്രിയങ്ക മോഹന്, സത്യരാജ്, ശരണ്യ പൊന്വണ്ണന്, വിനയ് രാജ് എന്നിവരാണ് ചിത്രത്തിലെ മറ്റ് അഭിനേതാക്കൾ. സൂര്യയുടെ നാൽപ്പതാമത് ചിത്രമായ ‘എതര്ക്കും തുനിന്തവന്’ അഞ്ച് ഭാഷകളിലായാണ് പുറത്തിറങ്ങുന്നത്.