ബ്രിട്ടീഷ് കാർ നിർമാതാക്കളായ മിനിയുടെ സൈഡ്വാക്ക് എഡിഷൻ ഇന്ത്യയ്ക്കായി അനുവദിച്ചിരിക്കുന്നത് 15 കാറുകൾ ആണ്. അതിലൊന്ന് സ്വന്തമാക്കിയിരിക്കുകയാണ് ടോവിനോ തോമസ്. കൊച്ചിയിലെ മിനി ഡീലർഷിപ്പിൽ നിന്നാണ് താരം വാഹനം സ്വന്തമാക്കിയത്. സവിശേഷതകളേറെയുള്ള ഈ മിനി കൺവെർട്ടബ്ളിന് 44.90 ലക്ഷം രൂപയാണു എക്സ് ഷോറൂം വില. 38.90 ലക്ഷം രൂപയ്ക്കു ലഭിക്കുന്ന, സാധാരണ കൂപ്പർ എസിനെ അഞ്ചു ലക്ഷം രൂപ അധികമാണ് ഈ പരിമിതകാലപതിപ്പിന്റെ വില.
ഡീപ് ലാഗുന മെറ്റാലിക് നിറത്തോടെ എത്തുന്ന മിനി കൺവെർട്ടബ്ൾ സൈഡ്വോക്ക് എഡീഷനിൽ 17 ഇഞ്ച് അലോയ് വീലും സൈഡ്വോക്ക് എഡീഷൻ സ്റ്റിക്കറും ബാഡ്ജിങ്ങുമൊക്കെയുണ്ട്. പൂർണമായും വിദേശത്ത് നിർമ്മിച്ച ഈ കാർ ഇറക്കുമതി വഴിയാണ് ഇന്ത്യയിലെത്തിയത്. എൽഇഡി ലൈറ്റിങ്, ആംബിയന്റ് ലൈറ്റിങ്, വാതിൽ തുറക്കുമ്പോൾ തിളങ്ങുന്ന ലോഗോ എന്നിവടയങ്ങിയ മിനി എക്സൈറ്റ്മെന്റ് പാക്കേജും മിനി കൺവെർട്ടബ്ൾ സൈഡ്വോക്ക് എഡീഷന്റെ ഭാഗമാണ്.