എനിക്ക് നേരെ തോക്ക് ചൂണ്ടിയാണ് തോർ അഭിനയം തുടങ്ങിയത്;ക്രിസ് ഹെംസ്​വേർത്തുമായുള്ള അടുപ്പം പങ്കുവെച്ച് തമ്പി ആന്റണി

അവഞ്ചേഴ്സ് ആരാധകരായി ലോകത്ത് എത്ര പേർ ഉണ്ട് എന്ന് ചോദിച്ചാൽ കണക്കെടുക്കാൻ പ്രയാസമാകും. അത്രത്തോളം ആരാധകൻ ഉണ്ട് അവഞ്ചേഴ്‌സിന്.അവഞ്ചേഴ്‌സിലെ സൂപ്പർ ഹീറോസിൽ ഏറ്റവും കൂടുതൽ ആരാധകരുള്ള കഥാപാത്രമാണ് തോർ. ഹോളിവുഡ് താരം ക്രിസ് ഹെംസ്​വേർത്ത് ആണ് ഈ കഥാപാത്രത്തെ അവിസ്മരണീയമാക്കിയത്. ക്രിസ്മായി നടനും നിർമാതാവുമായ തമ്പി ആൻറണിക്ക് വളരെ അടുത്ത ബന്ധമുണ്ട് .ഇത് എന്താണെന്ന് തൻറെ ഫേസ്ബുക്ക് പോസ്റ്റിലൂടെ വ്യക്തമാക്കിയിരിക്കുകയാണ് അദ്ദേഹം

ക്രിസിനെക്കുറിച്ച് തമ്പി ആന്റണി സമൂഹികമാധ്യമത്തിൽ പങ്കുവച്ച കുറിപ്പ് വായിക്കാം

ചില സൗഹൃദങ്ങൾ അങ്ങനെയാണ്. ഒരുപാടടുത്താലും പിന്നെ നമുക്കെത്തപ്പെടാൻ പറ്റാത്തത്ര ഔന്നിത്യങ്ങളിൽ എത്തിയിരിക്കും. ഒരുപക്ഷേ അവർ നമ്മളെ മറന്നിട്ടില്ലായിരിക്കും. എന്നാലും സാഹചര്യത്തിന്റെയും പ്രശസ്തിയുടെയും കടലാഴങ്ങളിൽപ്പെട്ടു നട്ടം തിരിയുന്നതാവാം. എന്തായാലും ഒരിക്കലും എത്തിപ്പിടിക്കാനാവാത്ത ഉയരങ്ങളിലേക്കു എത്തിനിൽക്കുന്ന ആ കൂട്ടുകാരനിൽ, ആ വലിയ നടന്റെ ഉയർച്ചയിൽ ഞാനിന്നഭിമാനിക്കുന്നു. ആദ്യ സിനിമയിൽത്തന്നെ എന്റെ നേരെ തോക്ക് ചൂണ്ടിക്കൊണ്ടാണ് ഇന്നത്തെ ഈ സൂപ്പർ സ്റ്റാർ ക്രിസ് ഹെംസ്​വേർത്ത് അഭിനയം തുടങ്ങുന്നതെന്നു പറഞ്ഞാൽ ആരെങ്കിലും വിശ്വസിക്കുമോ.

ഒന്നിച്ചു ഷിക്കാഗോയിലെ തെരുവീഥികളിലൂടെ എത്രയോ ദിവസം കറങ്ങി നടന്നിരുന്നു. മറ്റൊരു ഹോളിവുഡ് താരം ഷോൺ ബീനുമായി ബാറുകളിൽപോയി മദ്യപിച്ചിട്ടുണ്ടെന്നു പറഞ്ഞാലോ.. ഒന്നും എനിക്കുപോലും ഇന്ന് വിശ്വസിക്കാൻ ബുദ്ധിമുട്ടുണ്ട്. അത്രയ്ക്കും ഉന്നതങ്ങളിലാണ് അവരൊക്കെ. എന്നാലും ഇനിയുമൊരിക്കൽ കണ്ടുമുട്ടുമെന്ന പ്രതീക്ഷയോടെ.