വീണ്ടും കരുണയുടെ ജയസൂര്യ സ്പർശം ! മുപ്പത് ഭിന്നശേഷിക്കാർക്ക് വീൽചെയർ സമ്മാനിച്ച് ജയസൂര്യ

വെറും ഒരു താരം എന്ന നിലയിൽ തന്നാൽ ആകുന്ന നല്ല പ്രവർത്തികൾ കൂടി ചെയ്യുന്ന നടനാണ് ജയസൂര്യ.അതുകൊണ്ട് തന്നെയാണ് മലയാള മനസ്സുകളിൽ ഒരു പ്രത്യേക ഇടം ജയസൂര്യയ്ക്ക് മലയാളികൾ നല്കിയിട്ടുള്ളതും.ജയസൂര്യ ചെയ്ത് വരുന്ന നല്ല പ്രവർത്തികളിൽ മറ്റൊരു ഏട് കൂടി ചേർക്കപ്പെടുകയാണ്.

വഴിത്തല ശാന്തിഗിരി കോളജിലെ റിഹാബിലിറ്റേഷൻ സെന്റർ അന്തേവാസികളായ മുപ്പത് ഭിന്നശേഷിക്കാർക്ക് നടൻ ജയസൂര്യ വീൽചെയർ സമ്മാനിച്ചു. പുതിയ സിനിമയായ ഞാൻ മേരിക്കുട്ടിയുടെ ചിത്രീകരണവുമായി ബന്ധപ്പെട്ട് ശാന്തിഗിരിയിൽ എത്തിയതായിരുന്നു അദ്ദേഹം. സ്ഥലത്തെത്തി അവിടെയുള്ള അന്തേവാസികളുമായി ഇടപഴകുകയും അവരുടെ ആവശ്യം തിരിച്ചറിഞ്ഞ ശേഷം കോളജ് മാനേജ്മെന്റിനോട് തന്റെ സഹായസന്നദ്ധത അറിയിക്കുകയുമായിരുന്നു.

ശാന്തിഗിരി കോളജ്, ഭിന്നശേഷിക്കാരുടെ പുനരധിവാസത്തിന് വേണ്ടി നടത്തുന്ന പ്രവർത്തനങ്ങൾക്കുള്ള പിന്തുണയായാണ് ജയസൂര്യയുടെ സഹായഹസ്തം. ഭാര്യ സരിത ജയസൂര്യയും അദ്ദേഹത്തിനൊപ്പം ഉണ്ടായിരുന്നു.