‘ചെന്നൈയുടെ ‘ഹൃദയം’ കീഴടക്കി ഹൃദയം’: ഒരു മലയാളസിനിമയ്ക്ക് ഒരുദിവസം ലഭിക്കുന്ന ഏറ്റവും കൂടുതൽ ഷോ ഇനി ഹൃദയത്തിന് സ്വന്തം

ഒരു മലയാളസിനിമയ്ക്ക് എക്കാലവും ലഭിക്കുന്ന ഏറ്റവും കൂടുതൽ ഷോകൾ സ്വന്തമാക്കി ഹൃദയം. ചെന്നൈയിൽ 12 ഷോകൾ കൂടിയാണ് ഹൃദയം സിനിമയ്ക്ക് ലഭിച്ചിരിക്കുന്നത്. ചെന്നൈയിൽ ഒരു മോളിവുഡ് സിനിമയ്ക്ക് എക്കാലത്തെയും ഉയർന്ന ഒറ്റ ദിവസത്തെ ഷോ കൗണ്ട് ആണ് ഹൃദയത്തിന് ലഭിച്ചിരിക്കുന്നത്. ഒരു ദിവസം ഹൃദയം സിനിമയ്ക്ക് 75 ഷോകൾ ആണ് ചെന്നൈയിൽ ലഭിച്ചത്. മരക്കാറിന് 74 ഷോകളും കുറുപ്പിന് 46 ഷോകളും ആണ് ലഭിച്ചത്. അതേസമയം, കേരളത്തിലും ഹൃദയം സിനിമയ്ക്ക് കനത്ത ബുക്കിംഗ് ആണ് ലഭിച്ചിരിക്കുന്നത്. കോവിഡ് സാഹചര്യങ്ങൾക്കിടയിലും എക്സ്ട്രാ ഷോകളുമായി ഹൃദയം മുന്നേറിക്കൊണ്ടിരിക്കുകയാണ്.

അതേസമയം, കഴിഞ്ഞദിവസം സംവിധായകൻ വിനീത് ശ്രീനിവാസൻ ജീവിതത്തിൽ ഒരിക്കലും മറക്കാൻ കഴിയാത്ത ഒരു രാത്രിയുടെ വിശേഷങ്ങളുമായി സോഷ്യൽ മീഡിയയിൽ എത്തിയിരുന്നു. സംവിധായകൻ പ്രിയദർശൻ സിനിമ കാണാൻ എത്തിയതിന്റെ സന്തോഷമാണ് വിനീത് ശ്രീനിവാസൻ സോഷ്യൽ മീഡിയയിൽ പങ്കുവെച്ചത്. പ്രിയദർശന് ഒപ്പമുള്ള ചിത്രം പങ്കുവെച്ച് ‘എ മില്യൺ ഡോളർ പിക്’ എന്നാണ് വിനീത് കുറിച്ചത്. ഹൃദയം സിനിമ കാണാൻ പ്രിയദർശൻ എത്തിയപ്പോൾ ആയിരുന്നു ഈ ചിത്രം പകർത്തിയത്. ഈ രാത്രി ഒരിക്കലും മറക്കാൻ കഴിയില്ലെന്നും വിനീത് കുറിച്ചു. ദൈവത്തിന് നന്ദി പറയുകയും ചെയ്തു താരം.

ഹൃദയം സിനിമ തിയറ്ററുകളിൽ റിലീസ് ചെയ്തത് ജനുവരി 21ന് ആയിരുന്നു. ഒരു കാലത്ത് മലയാള സിനിമയിലെ സൂപ്പർഹിറ്റ് കൂട്ടുകെട്ട് ആയിരുന്നു മോഹൻലാൽ – പ്രിയദർശൻ – ശ്രീനിവാസൻ. ഇവരുടെയെല്ലാം മക്കൾ ഒരുമിച്ചെത്തുന്ന സിനിമ എന്ന പ്രത്യേകതയോടെയാണ് ഹൃദയം എത്തിയത്. വിനീത് ശ്രീനിവാസൻ സംവിധാനം ചെയ്ത ചിത്രത്തിൽ പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിവർ ആയിരുന്നു പ്രധാനവേഷങ്ങളിൽ എത്തിയത്.