ബുക്ക് മൈ ഷോയിൽ ‘ഭീഷ്മ’യ്ക്ക് മുകളിൽ റേറ്റിംഗുമായി ’21 ഗ്രാംസ്’

വലിയ പരസ്യങ്ങളില്ലാതെ എത്തിയ ചിത്രം തിയറ്ററുകളിൽ മികച്ച പ്രതികരണവുമായി മുന്നേറുകയാണ്. അനൂപ് മേനോൻ നായകനായി എത്തിയ 21 ഗ്രാംസ് ആണ് മികച്ച പ്രേക്ഷക അഭിപ്രായം നേടി തിയറ്ററുകളിൽ പ്രദർശനം തുടരുന്നത്. അതേസമയം, ബുക്ക് മൈ ഷോയിൽ ചിത്രത്തിന് മികച്ച റേറ്റിംഗ് ആണ് ലഭിച്ചിരിക്കുന്നത്. ഭീഷ്മ പർവത്തിന് 91 ശതമാനം റേറ്റിംഗ് ആണ് ബുക്ക് മൈ ഷോയിൽ ലഭിച്ചിരിക്കുന്നത്. അതേസമയം, 21 ഗ്രാംസിന് 95 ശതമാനം റേറ്റിംഗ് ആണ് ബുക്ക് മൈ ഷോയിൽ ലഭിച്ചത്.

മാർച്ച് മൂന്നിന് ആയിരുന്നു തിയറ്ററുകളിൽ ഭീഷ്മപർവം എത്തിയത്. കോവിഡ് പ്രതിസന്ധിക്ക് ശേഷം തിയറ്ററുകളിൽ 100 ശതമാനം അനുമതി ലഭിച്ചതിനു ശേഷം തിയറ്ററുകളിലേക്ക് എത്തിയ ആദ്യചിത്രങ്ങളിൽ ഒന്നായിരുന്നു ഭീഷ്മപർവ്വം. മമ്മൂട്ടി ചിത്രങ്ങളിൽ വലിയ ഹൈപ്പോടെ എത്തിയ ചിത്രങ്ങളിൽ ഒന്ന് കൂടി ആയിരുന്നു അത്. ബിഗ് ബിക്ക് ശേഷം മമ്മൂട്ടിയെ നായകനാക്കി അമൽ നീരദ് സംവിധാനം ചെയ്ത ചിത്രമാണ് ഭീഷ്മപർവം. ബിഗ് ബി കഴിഞ്ഞ് പതിനാല് വർഷത്തിനു ശേഷം അമൽ നീരദും മമ്മൂട്ടിയും ഒരുമിച്ചപ്പോൾ പ്രേക്ഷകർ ആ ചിത്രം ഇരുകൈയും നീട്ടി സ്വീകരിച്ചു. മമ്മൂട്ടിക്ക് ഒപ്പം സൗബിൻ ഷാഹിർ, ഷൈൻ ടോം ചാക്കോ, നദിയ മൊയ്തു തുടങ്ങി നിരവധി താരങ്ങളാണ് ചിത്രത്തിൽ അണിനിരന്നത്.

കഴിഞ്ഞദിവസം തിയറ്ററുകളിലേക്ക് എത്തിയ അനൂപ് മേനോൻ ചിത്രം 21 ഗ്രാംസ് മികച്ച പ്രേക്ഷക പ്രതികരണമാണ് നേടിയത്. റിലീസ് ചെയ്ത് ദിവസങ്ങൾക്കുള്ളിൽ ചിത്രത്തിന്റെ റേറ്റിംഗ് ബുക്ക് മൈ ഷോയിൽ ഭീഷ്മപർവത്തിനും മുകളിൽ എത്തി. നന്ദ കിഷോർ എന്ന പൊലീസ് കഥാപാത്രമായാണ് അനൂപ് മേനോൻ ചിത്രത്തിൽ എത്തുന്നത്. രഞ്ജിത്, രഞ്ജി പണിക്കർ, ലെന, ലിയോണ ലിഷോയ്, അനു മോഹന്‍, മാനസ രാധാകൃഷ്ണന്‍, നന്ദു, ശങ്കര്‍ രാമകൃഷ്ണന്‍, പ്രശാന്ത് അലക്സാണ്ടര്‍, ചന്തുനാഥ്, മറീന മൈക്കിള്‍, വിവേക് അനിരുദ്ധ് എന്നിവരും ചിത്രത്തിൽ മികച്ച പ്രകടനം കാഴ്ച വെച്ചിട്ടുണ്ട്. ജിത്തു ദാമോദർ ആണ് ക്യാമറ.
അപ്പു എൻ ഭട്ടതിരിയാണ് എഡിറ്റിംഗ്. സംഗീതം – ദീപക് ദേവ്.