ആരെയും ശത്രുക്കളാക്കാൻ അല്ല ഡബ്ല്യുസിസി രൂപീകരിച്ചത്: രമ്യ നമ്പീശൻ

ഒരുപാട് വർഷത്തിന് ശേഷം വൈറസ് എന്ന ചിത്രത്തിലൂടെ മലയാളത്തിലേക്ക് തിരികെ വരികയാണ് രമ്യനമ്പീശൻ.മാതൃഭൂമി ക്ലബ് എഫ്.എം യു.എ.ഇയ്ക്ക് നൽകിയ അഭിമുഖത്തിൽ ആർ.ജെ സ്നേഹയോട് സംസാരിക്കുകയായിരുന്ന രമ്യ വൈറസ് എന്ന ചിത്രത്തിൽ അഭിനയിക്കാൻ അവസരം ലഭിച്ചതിൽ സന്തോഷമുണ്ടെന്ന് പറയുകയുണ്ടായി.തനിക്ക് ലഭിച്ചത് വലിയൊരു റോൾ അല്ലെങ്കിലും ഇത്രയും വലിയ ഒരു ടീമിന്റെ കൂടെ വർക്ക് ചെയ്യാൻ സാധിച്ചതിൽ വളരെ സംതൃപ്തി ഉണ്ടെന്നും രമ്യ പറഞ്ഞു.

ഡബ്ല്യുസിസി എന്ന സംഘടന രൂപീകരിച്ചതിനു മുൻപും അതിനു ശേഷവും ഉള്ള മലയാള സിനിമയുടെ അവസ്ഥയെക്കുറിച്ച് ചോദിച്ചപ്പോൾ ഡബ്ല്യുസിസി രൂപീകരിച്ചത് ആരെയും ശത്രുക്കൾ ആക്കാൻ അല്ല ഒരു ശുചീകരണം വേണമെന്ന് തോന്നിയത് കൊണ്ടാണ് എന്നായിരുന്നു രമ്യ നമ്പീശന്റെ മറുപടി. സന്തോഷത്തോടും സ്വാതന്ത്ര്യത്തോടുകൂടി ജോലി ചെയ്യുവാനുള്ള ആഗ്രഹം കൊണ്ടായിരുന്നു അതെന്നും വിജയമോ തോൽവിയോ എന്നതല്ല, പോരാടണം എന്ന ഉദ്ദേശത്തോടു കൂടിയാണ് ഡബ്ല്യൂ.സി.സി തുടങ്ങിയതെന്നും താരം പറഞ്ഞു. ഡബ്ല്യു സി സി ക്ക് തുടക്കംകുറിച്ചിട്ടുണ്ട് ഇപ്പോൾ രണ്ടു വർഷം കഴിഞ്ഞു.