ഓണത്തിന് പൃഥ്വിരാജും ലാലേട്ടനും നേർക്കുനേർ

പൃഥ്വിരാജ് മോഹൻലാലിനെ നായകനാക്കി സംവിധാനം ചെയ്ത ലൂസിഫർ വലിയ വിജയത്തിൻറെ നെറുകയിലാണ് ഇപ്പോൾ. ചിത്രം 200 കോടി കളക്ഷൻ പിന്നിട്ട് ജൈത്രയാത്ര തുടരുകയാണ്. ഓൺലൈൻ സ്ട്രീമിംഗ് ആരംഭിച്ചുവെങ്കിലും ചിത്രം ഇപ്പോഴും തിയേറ്ററുകളിൽ നിറഞ്ഞ സദസ്സിൽ തന്നെയാണ് പ്രദർശനം തുടരുന്നത്

എന്നാൽ അടുത്ത ഓണത്തിന് പൃഥ്വിരാജും മോഹൻലാലും ബോക്സോഫീസിൽ നേർക്കുനേർ ഏറ്റുമുട്ടുന്നു കാഴ്ചയാകും കേരള ബോക്സ് ഓഫീസിൽ നാം സാക്ഷ്യംവഹിക്കുക. മോഹൻലാൽ നായകനായി എത്തുന്ന ഇട്ടിമാണി മെയ്ഡ് ഇൻ ചൈനയും പൃഥ്വിരാജ് നായകനായെത്തുന്ന ബ്രദേഴ്സ് ഡേയും ഓണം റിലീസായി തീയേറ്ററുകളിലെത്തും.കിട്ടുന്ന വിവരങ്ങളനുസരിച്ച് രണ്ടു ചിത്രവും ഒരേ ദിവസം തന്നെയായിരിക്കും തിയേറ്ററുകളിലെത്തുക. അങ്ങനെയാണെങ്കിൽ ഓണത്തിന് മോഹൻലാൽ പൃഥ്വിരാജ് ബോക്സ് ഓഫീസ് യുദ്ധത്തിന് മലയാള സിനിമ സാക്ഷിയാകും. ഏറെ പ്രതീക്ഷയോടെ എത്തുന്ന രണ്ടു ചിത്രങ്ങളാണ് ഇട്ടിമാണിയും ബ്രദേഴ്‌സ് ഡേയും. കോമഡിയുടെ പശ്ചാത്തലത്തിലൊരുങ്ങുന്ന രണ്ടു ചിത്രവും പുതുമുഖ സംവിധായകർ ആണ് സംവിധാനം ചെയ്യുന്നത് എന്ന പ്രത്യേകതയും ഉണ്ട്.