ഉയരെ മലയാള സിനിമയിലെ ഏറ്റവും മഹത്തായ ശ്രമം : ഫാസിൽ

ടോവിനോ തോമസ്,ആസിഫ് അലി ,പാർവതി എന്നിവർ പ്രധാന കഥാപാത്രങ്ങളെ അവതരിപ്പിച്ച ചിത്രമാണ് ഉയരെ. ചിത്രം മികച്ച പ്രതികരണങ്ങളോടെ മുന്നേറുകയാണ്. ഇപ്പോൾ ചിത്രത്തെ പ്രശംസിച്ച് പ്രമുഖ സംവിധായകൻ ഫാസിൽ രംഗത്തെത്തിയിരിക്കുകയാണ്. മലയാള സിനിമയിലെ ഏറ്റവും മഹത്തായ ശ്രമമാണ് ഉയരെ എന്ന് ഫാസിൽ അഭിപ്രായപ്പെട്ടു. സിനിമാ മേഖലയിൽ നിന്നും ഒപ്പം അതിനുപുറമേ നിന്നും
പ്രേക്ഷകരെല്ലാം വാനോളം ഉയർത്തിയ ഉയരെ എന്ന ചിത്രത്തിന് ലഭിച്ച പുതിയ ഒരു അംഗീകാരമാണ് ഫാസിലിന്റെ ഈ വാക്കുകൾ. ദുരന്തങ്ങളെ തുടച്ചുനീക്കി സ്വപ്നങ്ങളെ തേടിപ്പിടിച്ച് കൈക്കുമ്പിളിൽ ആക്കിയ നായിക കഥാപാത്രത്തെ അവതരിപ്പിച്ച പാർവതി തിരുവോത്തിന്റെ പ്രകടനം ഏറെ പ്രശംസ നേടിയിരുന്നു.

ആസിഡ് ആക്രമണത്തിന് ഇരയായ പെൺകുട്ടിയുടെ ജീവിതം പറയുന്ന ഉയരെ സംവിധാനം ചെയ്തിരിക്കുന്നത് നവാഗതനായ മനു അശോകൻ ആണ്.ബോബി-സഞ്ജയ് ആണ് ചിത്രത്തിന് തിരക്കഥ രചിച്ചിരിക്കുന്നത്.ചില യഥാർത്ഥ സംഭവങ്ങൾ പ്രതിപാദിക്കുന്ന ചിത്രത്തിന്റെ തിരക്കഥ തന്നെയാണ് ഏറ്റവും കൂടുതൽ കരുത്തായി മാറുന്നത്. ഗോപി സുന്ദറാണ് ചിത്രത്തിന്റെ സംഗീത സംവിധായകൻ.ഗ്രഹലക്ഷ്മി പ്രൊഡക്ഷൻസും എസ് ക്യൂബ് ഫിലിംസും ചേർന്നാണ് ചിത്രം നിർമ്മിച്ചിരിക്കുന്നത്.മുകേഷ് മുരളീധരന്‍ ക്യാമറ കൈകാര്യം ചെയ്യുന്ന ചിത്രത്തിന്റെ എഡിറ്റിംഗ് മഹേഷ് നാരായണനും നിർവഹിച്ചിരിക്കുന്നു.