തകർത്തത് 37 കാറുകളും 5 ട്രക്കുകളും..! സാഹോയുടെ ആക്ഷന് മാത്രം ചിലവിട്ടത് 90 കോടി.!

രാജമൗലി ഒരുക്കിയ ബ്രഹ്മാണ്ഡ ചിത്രം ബാഹുബലിയുടെ പ്രഭാസിന് ലോകമെമ്പാടും ലക്ഷക്കണക്കിന് ആരാധകരാണ് ഉണ്ടായിരിക്കുന്നത്. അതിനാൽ തന്നെ ബാഹുബലിക്ക് ശേഷം പ്രഭാസ് നായകനാകുന്ന സാഹോക്ക് വൻ പ്രതീക്ഷ തന്നെയാണ് പ്രേക്ഷകർ നൽകിയിരിക്കുന്നത്. 300 കോടി ബഡ്‌ജറ്റിൽ ഒരുങ്ങുന്ന ചിത്രത്തിന്റെ ആക്ഷൻ രംഗങ്ങൾക്ക് മാത്രമായി 90 കോടി മുടക്കുന്നുണ്ട് എന്നാണ് റിപ്പോർട്ടുകൾ.

“സിനിമയിൽ കാണിക്കുന്ന 90 ശതമാനം രംഗങ്ങളും റിയലായിരിക്കണമെന്ന് ഞങ്ങൾക്ക് നിർബന്ധമുണ്ട്. ഒറിജിനൽ കാറുകളും ട്രക്കുകളും തന്നെയാണ് ആക്ഷൻ രംഗങ്ങളിൽ ഉപയോഗിച്ചിരിക്കുന്നത്. 27 കാറുകളും [നിർമാതാവ് അത് 37 കാറുകൾ ആണെന്ന് പിന്നീട് അറിയിച്ചിട്ടുണ്ട്] 5 ട്രക്കുകളും ആക്ഷൻ രംഗങ്ങൾക്ക് വേണ്ടി ക്രാഷ് ചെയ്‌തിട്ടുണ്ട്‌. ഗ്രാഫിക്‌സ് ഉപയോഗിക്കുന്നതിനേക്കാൾ കൂടുതലായി റിയലായിട്ടുള്ളത് തന്നെ പ്രേക്ഷകർക്ക് നൽകണമെന്ന് ഞങ്ങൾക്ക് ആഗ്രഹമുണ്ട്.” പ്രഭാസ് ഒരു അഭിമുഖത്തിൽ പറഞ്ഞു.

സുജീതാണ് ഈ ബഹുഭാഷാ ചിത്രത്തിന്റെ തിരക്കഥയും സംവിധാനവും. പ്രഭാസിന്റെ നായികയായി എത്തുന്നത് ശ്രദ്ധ കപൂറാണ്. അരുൺ വിജയ്, നീൽ നിതിൻ മുകേഷ്, എവെലിൻ ശർമ്മ, ജാക്കി ഷെറോഫ്, വെണ്ണല കിഷോർ എന്നിവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ഭാഗമതി, ഗാസി തുടങ്ങിയ ചിത്രങ്ങളുടെ ക്യാമറ ചലിപ്പിച്ച R മധിയാണ് ഛായാഗ്രഹണം. ശങ്കർ മഹാദേവൻ, എഹ്സാൻ നൂറാനി, ലോയ് മെൻഡോൺസാ എന്നിവർ ചേർന്ന് ഗാനങ്ങൾ ഒരുക്കുന്നു. ശ്രീകർ പ്രസാദാണ് എഡിറ്റിംഗ്.