ഒരു മലയാള ചിത്രത്തിന്റെ ഏറ്റവും വലിയ റിലീസ്; വിദേശത്ത് ചരിത്രം സൃഷ്ടിക്കാൻ ആറാട്ട്

ഒരു മലയാളചിത്രത്തിന്റെ ഏറ്റവും വലിയ റിലീസിന് തയ്യാറെടുക്കുകയാണ് മോഹൻലാൽ ചിത്രമായ ആറാട്ട്. പ്രിയദർശൻ മോഹൻലാലിനെ നായകനാക്കി സംവിധാനം ചെയ്ത ‘മരക്കാർ – അറബിക്കടലിന്റെ സിംഹം’ എന്ന ചിത്രമാണ് ഇതുവരെ ഏറ്റവും വലിയ ഓവർസീസ് റിലീസ് എന്ന റെക്കോർഡ് കൈവശം വെച്ചിരിക്കുന്നത്. മരക്കാർ 47 രാജ്യങ്ങളിലായി 630ൽ അധികം കേന്ദ്രങ്ങളിലാണ് റിലീസ് ചെയ്തത്. എന്നാൽ, ഈ റെക്കോർഡ് തകർത്ത് ഒന്നാമത് എത്താൻ ഒരുങ്ങുകയാണ് മോഹൻലാൽ ചിത്രമായ ‘ആറാട്ട്’.

വിംഗിൽ എന്റർടയിൻമെന്റ്സ് ആണ് ഗൾഫ് ഒഴികെയുള്ള ഈ ചിത്രത്തിന്റെ ഓവർസീസ് മാർക്കറ്റ് റിലീസ് എടുത്തിരിക്കുന്നത്. ഒരു മലയാള സിനിമയ്ക്ക് വിദേശത്ത് ലഭിക്കുന്ന ഏറ്റവും വലിയ റിലീസ് ആണ് ആറാട്ടിന് നൽകാനാണ് ഇവർ തയ്യാറെടുക്കുന്നത്. നോർത്ത് അമേരിക്കയിൽ മാത്രം മുന്നൂറിൽ അധികം സ്ക്രീനുകളിൽ ആയിരിക്കും ആറാട്ട് റിലീസ് ചെയ്യുക. മലയാള സിനിമയുടെ നോർത്ത് അമേരിക്ക മാർക്കറ്റ് എന്ന് പറയുന്നത് അമേരിക്ക, കാനഡ എന്നീ രാജ്യങ്ങൾ ഉൾപ്പെടുന്നതാണ്.

നോർത്ത് അമേരിക്കയിൽ ഇതുവരെയുള്ള ഏറ്റവും വലിയ റിലീസ് ‘മരക്കാർ – അറബിക്കടലിന്റെ സിംഹം’ ആയിരുന്നു. 180ഓളം ലൊക്കേഷനുകളിൽ ആണ് മരക്കാർ എത്തിയത്. അമേരിക്കയിൽ 150 സെന്ററുകളിലും കാനഡയിൽ 30 സെന്ററുകളിലും ആണ് മരക്കാർ റിലീസ് ചെയ്തത്. എന്നാൽ, ആറാട്ട് സിനിമ ഇവിടെ റിലീസിന് എത്തുന്നത് അതിന്റെ ഇരട്ടിയോളം സ്ക്രീനുകളിൽ ആണ്. ഇതുകൂടാതെ ഓസ്ട്രേലിയ, ന്യൂസീലൻഡ്, മറ്റു യൂറോപ്യൻ രാജ്യങ്ങൾ എന്നിവിടങ്ങളിലും ഏറ്റവും വലിയ റിലീസ് ആണ് ഒരു മലയാള ചിത്രം എന്ന നിലയിൽ ആറാട്ടിനെ കാത്തിരിക്കുന്നത്. ബി ഉണ്ണികൃഷ്ണൻ സംവിധാനം ചെയ്ത ആറാട്ട് ഫെബ്രുവരി പതിനെട്ടിനാണ് റിലീസ് ചെയ്യുക.