‘ഒന്ന് ബി പോസിറ്റീവായിരിക്കാൻ ബാക്കി എല്ലാം എ പോസിറ്റീവ്’ – എസ് എസ് എൽ സി റിസൾട്ട് പങ്കുവെച്ച് മീനാക്ഷി

കഴിഞ്ഞദിവസം ആയിരുന്നു എസ് എസ് എൽ സി പരീക്ഷയുടെ റിസൾട്ട് വന്നത്. പരീക്ഷയിൽ മികച്ച വിജയം കൈവരിച്ചവർ അതിന്റെ സന്തോഷത്തിലാണ്. അത്തരത്തിലൊരു സന്തോഷം പങ്കുവെച്ചിരിക്കുകയാണ് ബാലതാരവും അവതാരകയുമായ മീനാക്ഷിയും. പത്തിൽ ഒൻപത് വിഷയങ്ങൾക്ക് എ പ്ലസും ഒരു വിഷയത്തിന് ബി പ്ലസ് ഗ്രഡുമാണ് താരത്തിന് ലഭിച്ചിരിക്കുന്നത്. ഫിസിക്സിനാണ് ബി പ്ലസ് ഗ്രേഡ് ലഭിച്ചിരിക്കുന്നത്. ‘ഒന്ന് ബി പോസിറ്റീവായിരിക്കാൻ ബാക്കി എല്ലാം എ പോസിറ്റീവ്’ – എസ് എസ് എൽ സി റിസൾട്ട് പങ്കുവെച്ചു കൊണ്ട് മീനാക്ഷി കുറിച്ചു.

അനുനയ അനൂപ് എന്നാണ് മീനാക്ഷിയുടെ യഥാർത്ഥ പേര്. അനൂപ് – രമ്യ ദമ്പതികളുടെ മകളായ മീനാക്ഷി, കോട്ടയം സ്വദേശിയാണ്. കോട്ടയത്തുള്ള കിടങ്ങൂർ എൻ എസ് എസ് ഹൈസ്കൂളിൽ പഠിക്കുന്ന മീനാക്ഷിക്ക് ആരിഷ് എന്ന സഹോദരനുമുണ്ട്.

ഇത്തവണത്തെ വിജയം 99.26 ശതമാനമാണ്. കഴിഞ്ഞ തവണത്തെ വിജയ ശതമാനം 99.47 ആയിരുന്നു. 4,26,469 പേർ പരീക്ഷ എഴുതിയതിൽ 4,23,303 പേർ ഉന്നത വിദ്യാഭ്യാസത്തിനു യോഗ്യത നേടി. 44,363 പേർ എല്ലാ വിഷയത്തിലും എ പ്ലസ് നേടി. കഴിഞ്ഞ തവണ ഇത് 1,25,509 ആയിരുന്നു. വിജയശതമാനം കൂടുതലുള്ള റവന്യു ജില്ല കണ്ണൂർ (99.76%). വിജയശതമാനം കുറഞ്ഞ റവന്യു ജില്ല–വയനാട് (98.07%). വിജയശതമാനം കൂടുതലുള്ള വിദ്യാഭ്യാസ ജില്ല–പാല (99.94%). കുറഞ്ഞ വിദ്യാഭ്യാസ ജില്ല– ആറ്റിങ്ങൽ (97.98%). ഏറ്റവും കൂടുതൽ വിദ്യാർഥികൾക്ക് എ പ്ലസ് ലഭിച്ച വിദ്യാഭ്യാസ ജില്ല– മലപ്പുറം. 3024 വിദ്യാർഥികൾക്ക് എ പ്ലസ് ലഭിച്ചു. ഗൾഫിൽ 571 പേർ പരീക്ഷ എഴുതിയതിൽ 561 പേർ ഉന്നതവിദ്യാഭ്യാസത്തിനു യോഗ്യത നേടി. വിജയം 98.25%.