‘എന്റെ പിതാവിനെക്കുറിച്ച് പറയുമ്പോൾ കുറച്ച് സെൻസിറ്റീവ് ആണ്, ഞാനൊരു മണ്ടനല്ല, എല്ലാത്തിനും ഒരു പരിധി വേണം’ – അച്ഛനെക്കുറിച്ചുള്ള തമാശ ഇഷ്ടപ്പെട്ടില്ല, ഷോയിൽ നിന്നും ഇറങ്ങിപ്പോയി അഭിഷേക് ബച്ചൻ

പിതാവിനെക്കുറിച്ചുള്ള അവതാരകരുടെ പരാമർശത്തിൽ അസ്വസ്ഥനായി ഷോയിൽ നിന്ന് ഇറങ്ങിപ്പോയി നടൻ അഭിഷേക് ബച്ചൻ. പിതാവ് അമിതാഭ് ബച്ചനെക്കുറിച്ചുള്ള തമാശയാണ് അഭിഷേകിനെ അസ്വസ്ഥനാക്കിയത്. ‘കേസ് തോ ബത്താ ഹേ’ എന്ന പരിപാടിയുടെ പ്രമോയിലാണ് പരിപാടിയിൽ നിന്ന് ഇറങ്ങിപ്പോകുന്ന അഭിഷേക് ബച്ചനെ കാണുന്നത്. നടൻ റിതേഷ് ദേശ്മുഖ്, വരുൺ ശർമ എന്നിവർ ചേർന്നാണ് പരിപാടി അവതരിപ്പിക്കുന്നത്.

കോർട്ട് റൂം സംവാദ രൂപത്തിലാണ് ഈ പരിപാടി. സെലിബ്രിറ്റികൾ പ്രതിയുടെ കൂട്ടിലായിരിക്കും ഇരിക്കുക. ഈ പരിപാടിയിൽ പങ്കെടുത്തു കൊണ്ടിരിക്കുന്നതിനിടയിൽ പ്രകോപിതനായി അഭിഷേക് ബച്ചൻ ഇറങ്ങി പോകുകയായിരുന്നു. അമിതാഭ് ബച്ചനെക്കുറിച്ച് പറഞ്ഞ തമാശയാണ് അഭിഷേകിനെ പ്രകോപിപ്പിച്ചത്. തുടർന്ന് പരിപാടി നിർത്താൻ റിതേഷിനോട് അഭിഷേക് ബച്ചൻ ആവശ്യപ്പെടുകയായിരുന്നു.

ഇത് കുറച്ച് കൂടിപ്പോയെന്നും താനിവിടെ ഒരു കളിപ്പാവയാകുകയാണെന്നും തനിക്കത് മനസിലാകുന്നുണ്ടെന്നും അഭിഷേക് ബച്ചൻ പറഞ്ഞു. എന്നാൽ, ഇത് തന്റെ മാതാപിതാക്കളിലേക്ക് പോകേണ്ട. പിതാവിന്റെ കാര്യത്തിൽ താൻ കുറിച്ച് സെൻസിറ്റീവ് ആണെന്നും കുറച്ചുകൂടെ ബഹുമാനമാകാമെന്നും തമാശയാണെങ്കിലും പരിധി വിട്ട് പോകരുതെന്നും അഭിഷേക് പറ‍ഞ്ഞു. ആളുകൾ ഇപ്പോൾ പരിധി വിട്ട് പോകുകയാണെന്നും താൻ ഒരു വിഡ്ഡിയല്ലെന്നും അഭിഷേക് വ്യക്തമാക്കി.