‘മമ്മൂക്കയെ അംബേദ്കർ ആയാണ് അവിടെയുള്ളവർ കാണുന്നത്’; കണ്ണൂർ സ്ക്വാഡ് ഷൂട്ടിംഗ് വിശേഷങ്ങളുമായി അസീസ് നെടുമങ്ങാട്

മമ്മൂട്ടി നായകനായി എത്തുന്ന ചിത്രം കണ്ണൂർ സ്ക്വാഡ് റിലീസിന് ഒരുങ്ങുകയാണ്. സെപ്തംബർ 28ന് ചിത്രം തിയറ്ററുകളിലേക്ക് എത്തും. ചിത്രത്തിൽ മമ്മൂട്ടിക്ക് ഒപ്പം അസീസ് നെടുമങ്ങാട്, ശബരീഷ് വർമ, റോണി ഡേവിഡ് രാജ് എന്നിവരാണ് പ്രധാനവേഷങ്ങളിൽ എത്തുന്നത്. ചിത്രത്തിന്റെ പ്രമോഷന്റെ ഭാഗമായി അഭിമുഖം നൽകുന്നതിനിടെ അസീസ് നെടുമങ്ങാട് പറഞ്ഞ വാക്കുകളാണ് ഇപ്പോൾ ശ്രദ്ധേയമാകുന്നത്. കേരളത്തിന് പുറത്ത് പുനെയിലും മറ്റും ചിത്രത്തിന്റെ ഷൂട്ടിംഗ് ഉണ്ടായിരുന്നു. ഇതിനെക്കുറിച്ച് അവതാരക ചോദിച്ചപ്പോൾ പുനെയിലെ ആളുകൾ നല്ല സഹകരണം ആയിരുന്നെന്നും പട്ടാപ്പകൽ തെരുവുകളിൽ എല്ലാം ഷൂട്ട് ചെയ്യാൻ ആളുകൾ സഹകരിച്ചെന്നും അസീസ് പറഞ്ഞു. കൂടാതെ, അംബേദ്കർ എന്ന സിനിമയിൽ മമ്മൂട്ടി അംബേദ്കർ ആയി വേഷമിട്ടിരുന്നു. അതുകൊണ്ടു തന്നെ അവിടെയുള്ള ആളുകൾ മമ്മൂട്ടിയെ അംബേദ്കർ ആയാണ് കാണുന്നതെന്നും അസീസ് പറഞ്ഞു. മമ്മൂക്കെയ അംബേദ്കറിനെ പോലെയാണ് ആളുകൾ കാണുന്നതെന്നും അസീസ് പറഞ്ഞു.

മമ്മൂട്ടി കമ്പനിയുടെ നാലാമത് ചിത്രമാണ് കണ്ണൂർ സ്ക്വാഡ്. ചിത്രത്തിന്റെ റിലീസ് സെപ്തംബർ 28നാണ്. എ എസ് ഐ ജോർജ് മാർട്ടിൻ എന്ന കഥാപാത്രമായാണ് മമ്മൂട്ടി സിനിമയിൽ എത്തുന്നത്. റോബി വർഗീസ് രാജ് ആണ് ചിത്രം സംവിധാനം ചെയ്യുന്നത്. സെൻസറിങ്ങ് പൂർത്തിയായ സിനിമയ്ക്ക് യു എ സർട്ടിഫിക്കറ്റ് ആണ് ലഭിച്ചിരിക്കുന്നത്. ചിത്രത്തിന്റെ കഥ ഷാഫിയുടേതാണ്. ഡോക്ടർ റോണിയും ഷാഫിയും ചേർന്നാണ് തിരക്കഥ രചിച്ചിരിക്കുന്നത്. കുറ്റാന്വേഷണചിത്രമായാണ് കണ്ണൂർ സ്ക്വാഡ് എത്തുന്നത്. നൻപകൽ നേരത്ത് മയക്കം, റോഷാക്ക്, കാതൽ എന്നീ ചിത്രങ്ങൾക്ക് ശേഷം മമ്മൂട്ടി കമ്പനി നിർമിക്കുന്ന ചിത്രമാണ് കണ്ണൂർ സ്ക്വാഡ്.

സംവിധായകൻ റോബി രാജിന്റെ ആദ്യചിത്രം കൂടിയാണ് ഇത്. ഗ്രേറ്റ് ഫാദർ, പുതിയ നിയമം എന്നീ ചിത്രങ്ങളുടെ ഛായാഗ്രാഹകൻ ആയിരുന്നു റോബി രാജ്. കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവി‍ഡ്, മനോജ് കെ യു തുടങ്ങിയ താരങ്ങൾ പ്രധാന വേഷത്തിൽ എത്തുന്ന സിനിമ ഒരു ഇൻവെസ്റ്റിഗേഷൻ ത്രില്ലർ ആണ്. എസ് ജോർജാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ. മുഹമ്മദ് ഷാഫിയുടേതാണ് ചിത്രത്തിന്റെ കഥ. നടൻ റോണി ഡേവിഡ് രാജും മുഹമ്മദ് ഷാഫിയും ചേർന്നാണ് തിരക്കഥ രചിച്ചിരിക്കുന്നത്. മുഹമ്മദ് റാഹിൽ ആണ് ഛായാഗ്രഹണം. ചിത്രത്തിന്റെ സംഗീതം സുഷിൻ ശ്യാമും എഡിറ്റർ പ്രവീൺ പ്രഭാകറുമാണ്. ദുൽഖർ സൽമാന്റെ ഉടമസ്ഥതയിലുള്ള വേഫേയർ ഫിലിംസ് ആണ് ചിത്രം കേരളത്തിൽ വിതരണം നിർവഹിക്കുന്നത്. പാലാ, കൊച്ചി, കണ്ണൂർ, വയനാട്,അതിരംപള്ളി, പൂനെ, മുംബൈ എന്നീ സ്ഥലങ്ങളായിരുന്നു പ്രധാന ലൊക്കേഷനുകൾ.