മനുഷ്യർക്കെല്ലാം ഒരു ദൈവമാണെങ്കിൽ ഞാൻ വിശ്വസിക്കുമായിരുന്നു, ചിരിച്ചു കാണിക്കുന്നവർ എല്ലാവരും സുഹൃത്തുക്കളല്ല – മനസു തുറന്ന് നടൻ ബൈജു സന്തോഷ്

വളരെ ചെറുപ്പത്തിൽ തന്നെ മലയാള സിനിമയിലേക്ക് എത്തി നിരവധി ശ്രദ്ധേയമായ വേഷങ്ങളിലൂടെ പ്രേക്ഷകരെ രസിപ്പിച്ച താരമാണ് ബൈജു സന്തോഷ്. ജീവിതത്തെക്കുറിച്ചും സിനിമയെക്കുറിച്ചും വിശ്വാസത്തെക്കുറിച്ചും ബൈജു സന്തോഷ് വെളിപ്പെടുത്തിയ കാര്യങ്ങൾ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്. ഒരു ഓൺലൈൻ യു ട്യൂബ് ചാനലിന് നൽകിയ അഭിമുഖത്തിലാണ് ബൈജു സന്തോഷ് ചില തുറന്നു പറച്ചിലുകൾ നടത്തിയത്.

വിശ്വാസിയാണോ എന്ന ചോദ്യത്തിന് മനുഷ്യർക്കെല്ലാം ഒരു ദൈവമായിരുന്നെങ്കിൽ താൻ വിശ്വസിക്കുമായിരുന്നു എന്നായിരുന്നു ബൈജുവിന്റെ മറുപടി. ദൈവം എന്ന് പറയുന്നത് ഒരാളേ പാടുള്ളൂ. ഒരു വിഭാഗത്തിന് ഒരു ദൈവം. വേറെ വിഭാഗത്തിന് വേറെ ദൈവം. അല്ലാത്ത വിഭാഗത്തിന് വേറെ കുറേ ദൈവങ്ങള്‍. ഇത് എന്ത് ദൈവങ്ങളാണ്. എവിടെ തിരിഞ്ഞാലും ദൈവങ്ങളാണോയെന്നും ബൈജു സന്തോഷ് കാന്‍ ചാനല്‍ മീഡിയയ്ക്ക് നല്‍കിയ അഭിമുഖത്തില്‍ ചോദിക്കുന്നു.

ജീവിതത്തില്‍ പിടിച്ചുനില്‍ക്കുന്നത് താന്‍ ധൂര്‍ത്തില്ലാത്ത വ്യക്തിയായത് കൊണ്ടാണ്. ആര്‍ക്ക് വേണ്ടിയും ആരും ഉണ്ടാകില്ല എന്നത് ഇപ്പോള്‍ തത്വമായി മാറിയിരിക്കുകയാണ്. ചിരിച്ച് കാണിക്കുന്നവര്‍ എല്ലാവരും സുഹൃത്തുക്കള്‍ അല്ല. തനിക്കുണ്ടായ പോലെ സുഹൃത്തുക്കള്‍ മലയാള സിനിമയില്‍ ആർക്കും ഉണ്ടായിരുന്നില്ലെന്നും എന്നാല്‍ സഹായിക്കാന്‍ താന്‍ ഒരാളോടും പറഞ്ഞിട്ടില്ലെന്നും ബൈജു പറഞ്ഞു. അടുത്തിടെ പ്രിയദര്‍ശന്റെ കൊറോണ പേപ്പേര്‍സ് എന്ന ചിത്രത്തിനായി ഏഴു ദിവസത്തെ ഡേറ്റ് വാങ്ങി എന്നാല്‍ അത് വന്നപ്പോള്‍ താന്‍ അതില്‍ ഇല്ല. അതിന്‍റെ കാരണം ചോദിച്ചില്ലെന്നും അത് ചോദിക്കേണ്ട ആവശ്യമില്ലെന്നും ബൈജു പറഞ്ഞു. അത് വലിയ കാര്യമല്ല. അവരുടെ തീരുമാനങ്ങളാണ്. നമ്മളെപ്പോലെ ആയിരിക്കണം എല്ലാവരും എന്ന് ചിന്തിക്കുമ്പോഴാണ് പ്രശ്നം ഉണ്ടാകുന്നതെന്നും ബൈജു സന്തോഷ് വ്യക്തമാക്കി.