ഡിജിറ്റലി വളരുന്ന ലോകത്തിനൊപ്പം ദുൽഖർ സൽമാൻ; വൈറലായി പുതിയ പരസ്യം

പാൻ ഇന്ത്യൻ സൂപ്പർ സ്റ്റാർ ദുൽഖർ സൽമാൻ നായകനായി എത്തിയ ഒരു വീഡിയോയാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്. ദുൽഖർ സൽമാൻ അഭിനയിച്ച ഓക്സിജൻ ഡിജിറ്റലിന്റെ പുതിയ പരസ്യമാണ് ആരാധകർ ഏറ്റെടുത്തത്. ടെക്നോളജിക്ക് ഒപ്പം ജീവിക്കുന്നതിന്റെ പ്രാധാന്യത്തെക്കുറിച്ചാണ് പരസ്യത്തിൽ പറയുന്നത്. ‘ഇവിടെയെല്ലാം ടെക്നോളജി നമുക്കായി പ്രവർത്തിക്കുന്നു’ എന്നാണ് പരസ്യത്തിലെ ഒരു വാചകം. ഒരു ഷൂട്ടിംഗ് ലൊക്കേഷനിൽ നിന്ന് ലക്ഷ്വറി കാറിൽ സ്റ്റൈലിഷ് ലുക്കിൽ ഡിജിറ്റലി അപ്ഡേറ്റഡ് ആയ വീട്ടിലേക്ക് എത്തുന്ന ദുൽഖർ സൽമാനെയാണ് പരസ്യത്തിൽ കാണാൻ കഴിയുന്നത്. ഡിജിറ്റൽ കാര്യങ്ങൾ തിരഞ്ഞെടുക്കുമ്പോൾ എക്സ്പേർട്ടുകൾക്കൊപ്പം തിരഞ്ഞെടുക്കണമെന്ന് പറഞ്ഞാണ് ഓക്സിജൻ ഡിജിറ്റൽ എക്സ്പേർട്ടിനെ ദുൽഖർ പരിചയപ്പെടുത്തുന്നത്.

കഴിഞ്ഞദിവസം ആയിരുന്നു പരസ്യത്തിന്റെ ടീസർ ദുൽഖർ തന്റെ സോഷ്യൽ മീഡിയ അക്കൗണ്ടുകളിൽ പങ്കുവെച്ചത്. ലക്ഷ്വറി കാറിൽ സ്റ്റൈലിഷ് ലുക്കിൽ സ്വന്തമായി ഡ്രൈവ് ചെയ്തു പോകുന്ന ദുൽഖറിനെയാണ് ടീസറിൽ കാണുവാൻ സാധിക്കുന്നത്. മാർച്ച് 25 വൈകിട്ട് ആറ് മണി വരെ കാത്തിരിക്കാൻ ആയിരുന്നു ടീസറിൽ ദുൽഖർ പറഞ്ഞത്. എന്തിന്റെ ടീസർ ആണെന്ന ഒരു സൂചന പോലും തരാതെ ആയിരുന്നു ആ വീഡിയോ അപ്ഡേറ്റ് ചെയ്തത്.

അവസാനമായി പ്രേക്ഷകരിലേക്ക് എത്തിയ ദുൽഖർ സൽമാൻ ചിത്രങ്ങൾ സല്യൂട്ട്, കുറുപ്പ്, ഹേയ് സിനാമിക എന്നിവയാണ്. റോഷൻ ആൻഡ്രൂസ് – ബോബി സഞ്ജയ്‌ കൂട്ടുകെട്ടിലെ ആദ്യ ദുൽഖർ ചിത്രമായാണ് സല്യൂട്ട് എത്തിയത്. പൊലീസ് വേഷത്തിൽ ആയിരുന്നു ചിത്രത്തിൽ ദുൽഖർ എത്തിയത്. വേഫറെർ ഫിലിംസിന്റെ ബാനറിൽ ദുൽഖർ സൽമാൻ നിർമ്മിച്ച അഞ്ചാമത്തെ ചിത്രം കൂടിയായിരുന്നു സല്യൂട്ട്. ബോളിവുഡ് താരം ഡയാന പെന്റി നായികയായ ചിത്രത്തിൽ മനോജ് കെ ജയൻ, അലൻസിയർ, ബിനു പപ്പു, വിജയകുമാർ, ലക്ഷ്മി ഗോപാല സ്വാമി, സാനിയ ഇയ്യപ്പൻ തുടങ്ങിയവരാണ് അഭിനേതാക്കളായി എത്തിയത്. ചുപ്പ്, അഭിലാഷ് ജോഷി ഒരുക്കുന്ന കിംഗ്‌ ഓഫ് കൊത്ത, പറവക്ക് ശേഷം സൗബിൻ ഷാഹിർ ഒരുക്കുന്ന ഓതിരം കടകം തുടങ്ങിയവയാണ് ദുൽഖർ സൽമാന്റെ പുതിയ ചിത്രങ്ങൾ.