‘ബേസിലിന്റെ ചിത്രങ്ങൾ ഒരുപാടിഷ്ടമാണ്, മിന്നൽ മുരളി തിയറ്ററിൽ ഇറക്കാൻ ഒരുപാട് തവണ ഞാൻ അവരോട് പറഞ്ഞതാണ്’ – ദുൽഖർ സൽമാൻ

ടോവിനോ തോമസിനെ നായകനാക്കി സംവിധായകൻ ബേസിൽ ജോസഫ് ഒരുക്കിയ സൂപ്പർ ഹീറോ ചിത്രം ‘മിന്നൽ മുരളി’യെക്കുറിച്ച് മനസു തുറന്ന് ദുൽഖർ സൽമാൻ. കഴിഞ്ഞവർഷം ക്രിസ്മസ് റിലീസ് ആയി എത്തിയ ചിത്രം ഒടിടി റിലീസ് ആയിരുന്നു. മിന്നൽ മുരളിയെക്കുറിച്ചും ബേസിലിനെക്കുറിച്ചും തുറന്നു പറയുകയാണ് ദുൽഖർ സൽമാൻ. തന്റെ പുതിയ ചിത്രമായ ‘സീതാ രാമം’ പ്രൊമോഷനുമായി ബന്ധപ്പെട്ട് കൊച്ചിയിൽ എത്തിയപ്പോൾ ആണ് ദുൽഖർ സൽമാൻ മിന്നൽ മുരളിയെക്കുറിച്ച് വാചാലനായത്.

ബേസിലിന്റെ സിനിമകൾ തനിക്ക് ഒരുപാടിഷ്ടമാണെന്നും ടോവിനോ – ബേസിൽ കൂട്ടുകെട്ട് ഇഷ്ടമാണെന്നും ദുൽഖർ പറഞ്ഞു. മിന്നൽ മുരളി ഷൂട്ട് ചെയ്യുമ്പോൾ തന്നെ ഇതൊരു സൂപ്പർ സൂപ്പർ ഹീറോ പടം ആണെന്ന് ടോവിനോ പറഞ്ഞിരുന്നെന്ന് ദുൽഖർ വ്യക്തമാക്കി. ലോക്കൽ സൂപ്പർ ഹീറോ ആണെന്ന് അറിഞ്ഞപ്പോൾ തന്നെ ശരിക്കും എക്സൈറ്റഡ് ആയെന്നും പിന്നീട് സിനിമയുടെ ടീസർ കണ്ടപ്പോഴൊക്കെ ഒരുപാട് ഇഷ്ടപ്പെട്ടിരുന്നെന്നും ദുൽഖർ പറഞ്ഞു.

മിന്നൽ മുരളി തിയറ്ററിൽ ഇറക്കാൻ ഒരുപാട് തവണ അവരോട് പറഞ്ഞതാണെന്നും പിന്നീട് സിനിമ കണ്ടപ്പോൾ ആ ക്വാളിറ്റിയും തനിക്ക് ഒരുപാട് ഇഷ്ടപ്പെട്ടെന്നും അദ്ദേഹം പറഞ്ഞു. വെറുമൊരു എന്റർടയിൻമെന്റ് ചിത്രം മാത്രമല്ല. നല്ല ഡെപ്ത്തുള്ള സിനിമയാണ്. ഗുരു സോമസുന്ദരം ചെയ്ത റോളിൽ ഒരു പെയിനും നമുക്ക് കാണാൻ കഴിയുമെന്നും ദുൽഖർ സൽമാൻ പറഞ്ഞു. ഓഗസ്റ്റ് അഞ്ചിനാണ് ദുൽഖറിന്റെ പുതിയ ചിത്രം സീതാരാമം റിലീസ് ചെയ്യുന്നത്. ഹനു രാഘവപ്പുടിയാണ് ചിത്രം സംവിധാനം ചെയ്യുന്നത്.