‘കള്ളച്ചിരി വേണ്ട കേട്ടോ, ക്യാമറയിലേക്ക് നോക്കടാ’ – വാപ്പിച്ചിക്ക് മുമ്പിൽ മുട്ടിടിച്ച് പോസ് ചെയ്ത ഫോട്ടോകളുമായി ദുൽഖർ സൽമാൻ

സോഷ്യൽ മീഡിയയിൽ ദുൽഖർ സൽമാൻ പങ്കുവെച്ച പുതിയ ചിത്രങ്ങൾ ഇപ്പോൾ വൈറലായിരിക്കുകയാണ്. കാരണം ആ ഫോട്ടോ എടുത്തത് മറ്റാരുമല്ല, മലയാളസിനിമയുടെ മഹാനടനായ മമ്മൂട്ടിയാണ്. വാപ്പിച്ചിക്ക് മുമ്പിൽ മുട്ടിടിച്ചു കൊണ്ട് ഫോട്ടോയ്ക്ക് പോസ് ചെയ്തത് അടിക്കുറിപ്പായി കുറിച്ചു കൊണ്ടാണ് ദുൽഖർ പുതിയ ചിത്രങ്ങൾ പങ്കുവെച്ചത്.

ഫോട്ടോഗ്രഫിയോട് വളരെ ഇഷ്ടമുള്ള മമ്മൂട്ടി മമ്മൂട്ടി പല താരങ്ങളെടുയും ചിത്രങ്ങൾ എടുത്തിട്ടുണ്ട്. അതൊക്കെ സോഷ്യൽ മീഡിയയിൽ വൈറലായിട്ടുണ്ട്. ഇത്തവണ ഏതായാലും മകൻ ദുൽഖർ സൽമാൻ ആണ് മമ്മൂട്ടിക്ക് മോഡലായത്. ‘കള്ളച്ചിരി വേണ്ട കേട്ടോ, ക്യാമറയിലേക്ക് നോക്കെടാ എന്നൊക്കെ സീനിയർ പറയുമ്പോൾ നിങ്ങളുടെ മുട്ടുകൾ ചെറുതായി വിറയ്ക്കും, കാരണം ക്യാമറയ്ക്ക് പിന്നിൽ നിൽക്കുന്നത് അദ്ദേഹമാണ്’ – എന്ന് കുറിച്ച് മമ്മൂട്ടിയെ മെൻഷൻ ചെയ്തായിരുന്നു ദുൽഖറിന്റെ കുറിപ്പ്. മമ്മൂട്ടി എടുത്ത മൂന്നു ചിത്രങ്ങളാണ് ദുൽഖർ സോഷ്യൽ മീഡിയ പ്രൊഫൈലിൽ പങ്കുവെച്ചത്.

ഏതായാലും മമ്മൂട്ടി പകർത്തിയ ദുൽഖറിന്റെ ചിത്രങ്ങൾ സോഷ്യൽ മീഡിയ ഏറ്റെടുത്തു. ‘അനുഗ്രഹിക്കപ്പെട്ട മകൻ’, ‘മനോഹരമായ നിമിഷം’, ‘മൂന്ന് ചിത്രങ്ങളിലെയും എക്സ്പ്രഷൻസ് വ്യത്യസ്തമാണ്, അപൂർവ ചിത്രങ്ങൾ’ എന്നിങ്ങനെ പോകുന്നു കമന്റുകൾ. മമ്മൂട്ടി നായകനായി എത്തുന്ന സി ബി ഐ 5 തിയറ്ററുകളിലേക്ക് മെയ് ഒന്നിന് എത്തും. സി ബി ഐ പരമ്പരയിലെ അഞ്ചാമത്തെ ചിത്രത്തിനായുള്ള കാത്തിരിപ്പിലാണ് ആരാധകർ.