‘നഞ്ചിയമ്മ ദേശീയ അവാർഡ് ഉറപ്പായിട്ടും അർഹിക്കുന്നുണ്ട്’ – തുറന്നുപറഞ്ഞ് ദുൽഖർ സൽമാൻ

മികച്ച ഗായികയ്ക്കുള്ള ദേശീയ പുരസ്കാരം നഞ്ചിയമ്മയ്ക്ക് ലഭിച്ചതിന് പിന്നാലെ ചില വിവാദങ്ങളും വന്നിരുന്നു. നഞ്ചിയമ്മയ്‌ക്ക് പുരസ്കാരം നൽകിയതിന് എതിരെ ചിലർ രംഗത്തു വന്നതിനെ തുടർന്നായിരുന്നു അത്. എന്നാൽ, ബിജിബാലും അൽഫോൺസ് ജോസഫും ഉൾപ്പെടെയുള്ള സംഗീതജ്ഞർ നഞ്ചിയമ്മയ്ക്ക് പിന്തുണയുമായി എത്തിയിരുന്നു. ഇപ്പോൾ നടൻ ദുൽഖർ സൽമാനും നഞ്ചിയമ്മയ്ക്ക് അവാർഡ് ലഭിച്ചതിനെ അനുകൂലിച്ച് രംഗത്തെത്തിയിരിക്കുകയാണ്. തന്റെ പുതിയ സിനിമയായ ‘സീതാരാമം’ പ്രമോഷനുമായി ബന്ധപ്പെട്ട് കൊച്ചിയിൽ എത്തിയപ്പോൾ മാധ്യമപ്രവർത്തകരുടെ ചോദ്യത്തിന് മറുപടി ആയിട്ടായിരുന്നു ദുൽഖർ നഞ്ചിയമ്മയ്ക്ക് അവാർഡ് ലഭിച്ചതിനെ അനുകൂലിച്ച് സംസാരിച്ചത്.

വിവാദത്തെക്കുറിച്ച് താൻ അറിഞ്ഞിട്ടില്ലെന്നും തന്റെ മനസിൽ നഞ്ചിയമ്മയ്ക്കാണ് അവാർഡെന്നും ദുൽഖർ വ്യക്തമാക്കി. നഞ്ചിയമ്മ അത് പാടിയ രീതിയും പാട്ടും ഒരുപാട് ഇഷ്ടപ്പെട്ടെന്നും ദുൽഖർ പറഞ്ഞു. നഞ്ചിയമ്മ അത് അങ്ങേയറ്റം അർഹിക്കുന്നുണ്ടെന്നും ആ പാട്ടും നഞ്ചിയമ്മ പാടിയ രീതിയും തനിക്ക് ഒരുപാട് ഇഷ്ടമാണെന്നും ദുൽഖർ പറഞ്ഞു. എല്ലാത്തിന്റെയും ശാസ്ത്രം നോക്കാൻ തനിക്കറിയില്ലെന്നും താൻ തന്നെ കംപ്യൂട്ടർ ഉപയോഗിച്ചാണ് പാടുന്നതെന്നും ദുൽഖർ പറഞ്ഞു. ലൈവിൽ ചുന്ദരിപെണ്ണേ പാടാൻ പറഞ്ഞാൽ താൻ പെട്ടുപോകുമെന്നും ദുൽഖർ വ്യക്തമാക്കി.

നഞ്ചിയമ്മയ്ക്ക് അവാർഡ് പ്രഖ്യാപിച്ചതിനു പിന്നാലെ ലിനുലാൽ ആണ് വിമർശനവുമായി രംഗത്തെത്തിയത്. സംഗീതത്തിന് വേണ്ടി ജീവിതം ഉഴിഞ്ഞുവെച്ചവർക്ക് നഞ്ചിയമ്മയ്ക്ക് അവാർഡ് നൽകിയത് അപമാനമായി തോന്നിയെന്ന് ആയിരുന്നു ഇയാൾ പറഞ്ഞത്. സംഭവം വിവാദമായതോടെ നിരവധി പേരാണ് നഞ്ചിയമ്മയ്ക്ക് പിന്തുണയുമായി എത്തിയത്.