‘കേരളത്തിന് ജാതിയും മതവുമില്ലാത്ത വികസനമാണ് ആവശ്യം’; തിരുവോണത്തലേന്ന് പ്രധാനമന്ത്രിക്ക് പ്രശംസയുമായി ഹരീഷ് പേരടി, ഇങ്ങനെയെങ്കിൽ കേരളം നിങ്ങൾക്ക് നേരിട്ട് കൈ തരുമെന്നും താരം

പ്രധാനമന്ത്രി നരേന്ദ്ര മോദിയെ അഭിനന്ദിച്ച് ഹരീഷ് പേരടി. തിരുവോണത്തലേന്ന് ഫേസ്ബുക്കിൽ പങ്കുവെച്ച കുറിപ്പിലാണ് പ്രധാനമന്ത്രിയെയും കേന്ദ്രസർക്കാരിനെയും ഹരീഷ് പേരടി അഭിനന്ദിച്ചത്. മെട്രോയുടെ രണ്ടാംഘട്ട വികസനത്തിന് മുൻകൈ എടുത്തതിന് ആയിരുന്നു പ്രശംസ. വികസനം ഇങ്ങനെയാണെങ്കിൽ ഒരു ഇടനിലക്കാരുമില്ലാതെ കേരളം നിങ്ങൾക്ക് നേരിട്ട് കൈ തരുമെന്ന് ഹരീഷ് കുറിച്ചു.

ഹരീഷ് പേരടി ഫേസ്ബുക്കിൽ പങ്കുവെച്ച കുറിപ്പ്, ‘മോദിജീ ഞാൻ കാക്കനാടാണ് താമസിക്കുന്നത്. മെട്രോയുടെ രണ്ടാഘട്ട വികസനം എന്റെ വീട്ടിനടുത്തേക്ക് എത്തുന്നു എന്നറിയുന്നതിൽ വ്യക്തിപരമായി നിറഞ്ഞ സന്തോഷം. കേരളത്തിന്റെ വികസനത്തിന് അനുമതി നൽകിയതിൽ ഫണ്ട് അനുവദിച്ചതിൽ ഒരു മലയാളി എന്ന നിലക്ക് ഹൃദയം നിറഞ്ഞ നന്ദി. ഇങ്ങനെയാണെങ്കിൽ ഒരു ഇടനിലക്കാരുമില്ലാതെ കേരളം നിങ്ങൾക്ക് നേരിട്ട് കൈ തരും. കേരളത്തിന് ജാതിയും മതവുമില്ലാത്ത വികസനമാണ് ആവശ്യം. മോദിജീ ഹൃദയം നിറഞ്ഞ ഓണാശംസകൾ..’ – പ്രധാനമന്ത്രിക്ക് ഓണാശംകൾ നേർന്നാണ് ഹരീഷ് പേരടിയുടെ കുറിപ്പ് അവസാനിക്കുന്നത്.

കൊച്ചി മെട്രോയുടെ രണ്ടാംഘട്ടത്തിന് അനുമതി നൽകിയ പ്രധാനമന്ത്രി നരേന്ദ്ര മോദിക്ക് കഴിഞ്ഞദിവസം മുഖ്യമന്ത്രി പിണറായി വിജയനും നന്ദി അറിയിച്ചിരുന്നു. മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗമാണ് കൊച്ചി മെട്രോയുടെ രണ്ടാം ഘട്ടത്തിന് അനുമതി നൽകിയത്. ഇതിനു പിന്നാലെയാണ് മുഖ്യമന്ത്രി നന്ദി അറിയിച്ചത്. ബഹുമാനപ്പെട്ട പ്രധാനമന്ത്രിക്ക് കേരളത്തിലെ ജനങ്ങളുടെ പേരിൽ നന്ദി പറയുന്നതായാണ് മുഖ്യമന്ത്രി ട്വീറ്റ് ചെയ്തത്.