‘അഭിമാനത്തോടെ ഞാൻ പറയും, ഇത് മഹാനടൻ മാത്രമല്ല; മഹാ മനുഷ്യത്വവുമാണ്. ഒരേയൊരു മോഹൻലാൽ’ – തുറന്നുപറഞ്ഞ് ഹരീഷ് പേരടി

മലയാളത്തിന്റെ പ്രിയനടൻ മോഹൻലാലിനെക്കുറിച്ച് തുറന്നുപറഞ്ഞ് നടൻ ഹരീഷ് പേരടി. മോഹൻലാൽ മഹാനടൻ മാത്രമല്ലെന്നും മഹാ മനുഷ്യത്വവുമാണെന്ന് തുറന്നു പറഞ്ഞിരിക്കുകയാണ് ഹരീഷ്. ഫേസ്ബുക്കിൽ പങ്കുവെച്ച കുറിപ്പിലാണ് മോഹൻലാൽ എന്ന നടനെക്കുറിച്ച് തുറന്നു പറയുന്നത്. ലിജോ ജോസ് പെല്ലിശ്ശേരിയുടെ സിനിമയുടെ ലൊക്കേഷനിൽ നിന്നുള്ള ചിത്രം പങ്കുവെച്ചാണ് ഹരീഷ് പേരടി ഇങ്ങനെ കുറിച്ചത്. ലിജോ ചിത്രത്തിൽ അവതരിപ്പിക്കുന്ന പുതുമുഖ നടനായ മനോജിന്റെ പിറന്നാൾ ആഘോഷത്തിന്റെ ചിത്രം പങ്കുവെച്ച് ആയിരുന്നു ഹരീഷിന്റെ കുറിപ്പ്.

പിറന്നാൾ കേക്ക് മുറിക്കുന്ന മനോജിന്റെ പിറകിലായാണ് മോഹൻലാൽ നിൽക്കുന്നത്. മുന്നിൽ നിൽക്കുന്ന തങ്ങളല്ല താരങ്ങളെന്നും വലിപ്പ ചെറുപ്പുമില്ലാതെ പകയും വിദ്വേഷവുമില്ലാതെ എല്ലാവരെയും കൂടെ നിർത്തുന്ന എല്ലാവരെയും മുന്നിലേക്ക് തള്ളി നിർത്തുന്ന മോഹൻലാൽ ആണ് യഥാർത്ഥതാരമെന്നും വ്യക്തമാക്കുകയാണ് ഹരീഷ്. ..അയാൾക്ക് പകരം മറ്റൊരാൾ ആയിരുന്നെങ്കിൽ ഒരു നോ മതിയെന്നും താനൊന്നും ഈ സിനിമയിലെ ഉണ്ടാകില്ലായിരുന്നെന്നും പറയുന്നു ഹരീഷ്. മഹാനടൻ മാത്രമല്ല മഹാമനുഷ്യത്വവുമാണ് മോഹൻലാൽ എന്ന് പറഞ്ഞാണ് കുറിപ്പ് അവസിനിക്കുന്നത്.

ഹരീഷ് പേരടി പങ്കുവെച്ച കുറിപ്പ്, ‘ലിജോ അവതരിപ്പിക്കുന്ന പുതുമുഖ നടൻ മനോജിന്റെ പിറന്നാളാണ് …മുന്നിൽ നിൽക്കുന്ന ഞങ്ങളല്ല താരങ്ങൾ…വലിപ്പ ചെറുപ്പുമില്ലാതെ പകയും വിദ്വേഷവുമില്ലാതെ എല്ലാവരെയും കൂടെ നിർത്തുന്ന..എല്ലാവരെയും മുന്നിലേക്ക് തള്ളി നിർത്തുന്ന..ആ പിന്നിൽ നിൽക്കുന്ന ആ മഞ്ഞ കുപ്പായക്കാരനാണ് യഥാർത്ഥ താരം..നമ്മുടെ ലാലേട്ടൻ..അയാൾക്ക് പകരം മറ്റൊരാൾ ആയിരുന്നെങ്കിൽ ഒരു നോ മതി…ഞാനൊന്നും ഈ സിനിമയിലെ ഉണ്ടാകില്ല..പക്ഷെ ആ മനുഷ്യൻ എന്നോടെന്നല്ല ആരോടും അങ്ങിനെ പറയില്ല…അഭിമാനത്തോടെ ഞാൻ പറയും..ഇത് മഹാനടൻ മാത്രമല്ല…മഹാ മനുഷ്യത്വവുമാണ്..ഒരെയൊരു മോഹൻലാൽ ..’