‘ഉയരെ സിനിമയോട് അഭിപ്രായവ്യത്യാസങ്ങൾ ഉണ്ട്, സിദ്ദിഖും പാർവതിയും ഒന്നിച്ചഭിനയിച്ച രംഗങ്ങൾ മനോഹരമായിരുന്നു’ – ഹരീഷ് പേരടി

നടി ആക്രമിക്കപ്പെട്ട സംഭവം സമൂഹമാധ്യമങ്ങളിൽ വീണ്ടും സജീവ ചർച്ചയായിരിക്കുകയാണ്. ഇതിനിടയിലാണ് ഉയരെ എന്ന സിനിമയെക്കുറിച്ച് നടൻ ഹരീഷ് പേരടി സോഷ്യൽ മീഡിയയിൽ ഒരു കുറിപ്പ് പങ്കുവെച്ചിരിക്കുന്നത്. സിനിമയെക്കുറിച്ച് ചില അഭിപ്രായ വ്യത്യാസങ്ങൾ ഉണ്ടെങ്കിലും സിദ്ധിഖും പാർവതിയും ഒന്നിച്ച അഭിനയിച്ച അച്ഛൻ മകൾ രംഗങ്ങൾ മനോഹരമായിരുന്നെന്നും അവരിരുവരും നല്ല നടനും നടിയുമാണെന്ന് ആയിരുന്നു ഹരീഷ് പേരടി കുറിച്ചത്. ‘ഉയരെ എന്ന സിനിമയോട് ചില അഭിപ്രായ വിത്യാസങ്ങൾ ഉണ്ടെങ്കിലും സിദ്ധിഖും പാർവതിയും ഒന്നിച്ച അഭിനയിച്ച അച്ഛൻ മകൾ രംഗങ്ങൾ മനോഹരമായിരുന്നു…സിദ്ധിക്കേട്ടനും പാർവതിയും നല്ല നടനും നടിയുമാണ് ആശംസകൾ’ – ഹരീഷ് പേരടി കുറിച്ചു.

നടിയെ ആക്രമിച്ച കേസുമായി ബന്ധപ്പെട്ട് സിദ്ദിഖിന്റെ പേരും ഉയർന്നു കേൾക്കുന്ന സമയത്താണ് ഹരീഷ് പേരടിയുടെ പോസ്റ്റ് എന്നതും ശ്രദ്ധേയമാണ്. ട്രാളാണോയെന്ന് കമന്റ് ബോക്സിൽ ഒരാൾ ചോദിക്കുമ്പോൾ ‘ഈ സമയമാണ് അഭിപ്രായത്തിന് നല്ലത് അല്ലേ’ എന്നാണ് മറ്റൊരാൾ ചോദിക്കുന്നത്. നടിയെ ആക്രമിച്ച സംഭവത്തിൽ നടൻ സിദ്ദിഖിന്റെ പങ്ക് വെളിപ്പെടുത്തുന്ന രീതിയിലുള്ള കത്ത് കഴിഞ്ഞദിവസം പുറത്തു വന്നിരുന്നു. പൾസർ സുനി എഴുതിയ കത്തിൽ ദിലീപ് ഗൂഢാലോചന നടത്തുമ്പോൾ നടൻ സിദ്ദിഖും അടുത്തുണ്ടായിരുന്നതായി പറയുന്നുണ്ട്.

2018ലാണ് പൾസർ സുനി ഈ കത്തെഴുതുന്നത്. കത്ത് പള്‍സര്‍ സുനി തന്റെ അമ്മയ്ക്ക് സൂക്ഷിക്കാന്‍ കൊടുത്തതായിരുന്നു. തനിക്കെന്തെങ്കിലും സംഭവിച്ചാല്‍ കത്ത് പുറത്തുവിടണമെന്ന് പള്‍സര്‍ സുനി അമ്മക്ക് നിര്‍ദേശം നല്‍കുകയും ചെയ്തിരുന്നു.