21 ഗ്രാംസ്: സ്വന്തം സിനിമയുടെ പോസ്റ്റർ ഒട്ടിക്കാമോ? നട്ടപ്പാതിരയ്ക്ക് പോസ്റ്റർ ഒട്ടിച്ച് ജീവ; അനൂപ് മേനോനും സംവിധായകനും ചലഞ്ച്

അനൂപ് മേനോൻ നായകനായി എത്തുന്ന പുതിയ ചിത്രമാണ് 21 ഗ്രാംസ്. ഏതായാലും സിനിമയുടെ റിലീസിന് മുമ്പായി ഒരു ചലഞ്ച് നേരിടേണ്ടി വന്നിരിക്കുകയാണ് നായകനായ അനൂപ് മേനോൻ. കഴിഞ്ഞദിവസം രാത്രിയാണ് അവതാരകനും നടനുമായ ജീവ അഭിനേതാക്കളെ വെല്ലുവിളിച്ച് എത്തിയത്. പാതിരാത്രിയിൽ തെരുവിൽ ഇറങ്ങി 21 ഗ്രാംസ് സിനിമയുടെ പോസ്റ്റർ ഒട്ടിച്ച ജീവ അനൂപ് മേനോനെയും സംവിധായകനെയും പോസ്റ്റർ ഒട്ടിക്കാൻ ക്ഷണിക്കുകയും ചെയ്തു.

കഴിഞ്ഞദിവസം രാത്രി കാക്കനാട് പരിസരത്ത് ആണ് 21 ഗ്രാംസിന്റെ പോസ്റ്റർ ജീവയും സുഹൃത്തുക്കളും ചേർന്ന് ഒട്ടിച്ചത്. പോസ്റ്റർ ഒട്ടിച്ചു കഴിഞ്ഞതിനു ശേഷമാണ് അനൂപ് മേനോനെയും സംവിധായകനെയും മറ്റ് അണിയറപ്രവർത്തകരെയും പോസ്റ്റർ ഒട്ടിക്കാൻ ജീവ ക്ഷണിച്ചത്. മാർച്ച് 18ന് തിയറ്ററുകളിലാണ് 21 ഗ്രാംസ് റിലീസ് ചെയ്യുന്നത്. ഏതായാലും ഇൻസ്റ്റഗ്രാമിൽ ജീവ പങ്കുവെച്ച വീഡിയോ നിരവധി പേരാണ് പങ്കുവെച്ചിരിക്കുന്നത്.

ബിബിൻ കൃഷ്ണയാണ് ചിത്രം തിരക്കഥ എഴുതി സംവിധാനം ചെയ്തിരിക്കുന്നത്. കെ എന്‍ റിനിഷ് ആണ് സിനിമ നിര്‍മ്മിക്കുന്നത്. ലിയോണ ലിഷോയ്, അനു മോഹന്‍, രൺജി പണിക്കര്‍, രഞ്ജിത്, ലെന, നന്ദു, മാനസ രാധാകൃഷ്ണന്‍, പ്രശാന്ത് അലക്സാണ്ടര്‍, മറീന മൈക്കിള്‍, ബിനീഷ് ബാസ്റ്റിന്‍ തുടങ്ങിയവരാണ് മറ്റ് പ്രധാന താരങ്ങള്‍. ഛായാഗ്രഹണം – ജിത്തു ദാമോദര്‍, ചിത്രസംയോജനം – അപ്പു എന്‍ ഭട്ടതിരി, സംഗീതം – ദീപക് ദേവ്, വരികൾ – വിനായക് ശശികുമാര്‍, സൗണ്ട് മിക്സ് – പി സി വിഷ്ണു, സൗണ്ട് ഡിസൈന്‍ – ജുബിന്‍, പ്രോജക്ട് ഡിസൈനര്‍ – നോബിള്‍ ജേക്കബ്, പ്രൊഡക്ഷന്‍ ഡിസൈനര്‍ – സന്തോഷ് രാമന്‍, എക്സിക്യൂട്ടീവ് പ്രൊഡ്യൂസര്‍സ് – ഷിനോജ് ഓടണ്ടിയില്‍.