ഭാര്യയുടെ അച്ഛനും അമ്മയും വോട്ടേഴ്‌സ് ലിസ്റ്റിലില്ല; ബിജെപിക്ക് വോട്ട് ചെയ്യുമെന്നുള്ളത് കൊണ്ട് കട്ട് ചെയ്തതാണെന്ന് ആരോപിച്ച് കൃഷ്ണകുമാർ

തന്റെ ഭാര്യയുടെ മാതാപിതാക്കളുടെ പേര് ഈ തവണത്തെ വോട്ടേഴ്‌സ് ലിസ്റ്റിൽ ഇല്ലെന്നും ബിജെപിക്ക് വോട്ട് ചെയ്യുമെന്നുള്ളത് കൊണ്ട് കട്ട് ചെയ്തതാണെന്നും ആരോപിച്ച് നടൻ കൃഷ്ണകുമാർ. വോട്ടേഴ്‌സ് ലിസ്റ്റിൽ എന്തൊക്കെയോ തിരിമറികൾ നടന്നിട്ടുണ്ടെന്നും അദ്ദേഹം മനോരമ ഓൺലൈനുമായുളള അഭിമുഖത്തിൽ പറഞ്ഞു.

ബിജെപി ഭരണത്തിൽ എത്താനുള്ള എല്ലാ സാഹചര്യവും ഒത്തു വരുന്നുണ്ട്. പക്ഷേ വോട്ടേഴ്‌സ് ലിസ്റ്റിൽ എന്തൊക്കെയോ തിരിമറികൾ നടന്നിട്ടുണ്ട് എന്ന് എല്ലാ മേഖലയിൽ നിന്നും കേൾക്കുന്നുണ്ട്. അത് എന്റെ കുടുംബത്തിൽ പോലും ഉണ്ടായി. തിരുവനന്തപുരം വട്ടിയൂർക്കാവ് നെട്ടയത്തു താമസിക്കുന്ന എന്റെ ഭാര്യയുടെ അച്ഛനും അമ്മയും വോട്ടേഴ്‌സ് ലിസ്റ്റിൽ ഇല്ല എന്ന് ഇന്ന് രാവിലെയാണ് അറിയുന്നത്, അന്വേഷിച്ചപ്പോൾ അറിഞ്ഞത് വീട്ടിൽ ആളില്ലാത്തതുകൊണ്ടു ലിസ്റ്റിൽ നിന്നും ഒഴിവാക്കി എന്ന്. പക്ഷേ അവർ വർഷങ്ങളായി അവിടെ താമസിക്കുന്നവരാണ്. അവർ ബിജെപിക്ക് വോട്ട് ചെയ്യുമെന്ന് ഉറപ്പുള്ളതുകൊണ്ടു ലിസ്റ്റിൽ നിന്നും കട്ട് ചെയ്തു എന്നാണു കരുതേണ്ടത്, പ്രായമായവരാണ് അതുകൊണ്ട് അവർക്ക് ശ്രദ്ധിക്കാൻ കഴിഞ്ഞില്ല. പക്ഷേ ഇത്തരം തിരിമറികൾ നടന്നു വോട്ടു മറിച്ചാൽ പോലും ബിജെപി ജയിക്കും എന്നാണു ഞാൻ കരുതുന്നത്.