ആദ്യസിനിമ ഇൻഡസ്ട്രിയൽ ഹിറ്റ്, നൂറാം സിനിമ നൂറുകോടി ക്ലബിൽ – മലയാളം സിനിമയിൽ ചരിത്രം കുറിച്ച് കുഞ്ചാക്കോ ബോബൻ

അനിയത്തി പ്രാവ് എന്ന ചിത്രത്തിലൂടെ മലയാളിയുവത്വത്തിന്റെ മനസിലേക്ക് കുടിയേറിയ പ്രണയനായകൻ ആയിരുന്നു കുഞ്ചാക്കോ ബോബൻ. ചിത്രത്തിൽ ശാലിനി ആയിരുന്നു കുഞ്ചാക്കോ ബോബന്റെ നായികയായി എത്തിയത്. ചാക്കോച്ചന്റെ ആദ്യചിത്രം തന്നെ ഇൻഡസ്ട്രിയൽ ഹിറ്റ് ആയിരുന്നു. ഇപ്പോൾ നൂറാം ചിത്രം നൂറുകോടി ക്ലബിൽ എത്തിയതിന്റെ സന്തോഷത്തിലാണ് കുഞ്ചാക്കോ ബോബൻ.

കുഞ്ചാക്കോ ബോബന്റെ നൂറാം ചിത്രമായ 2018 നൂറു കോടി ക്ലബിൽ എത്തിയപ്പോൾ അജു വർഗീസ് ആണ് ഈ സന്തോഷവാർത്ത സോഷ്യൽ മീഡിയയിലൂടെ പങ്കുവെച്ചത്. കമന്റ് ബോക്സിൽ കുഞ്ചാക്കോ ബോബന് നിറയെ ആരാധകരുടെ ആശംസകളാണ്. ആദ്യചിത്രമായ അനിയത്തിപ്രാവിൽ നായികയ്ക്ക് ഒപ്പമുള്ള ഒരു ചിത്രവും 2018ലെ ചിത്രവും പങ്കുവെച്ച് ആയിരുന്നു കുഞ്ചാക്കോ ബോബന് അഭിനന്ദനം അറിയിച്ചുള്ള അജു വർഗീസിന്റെ പോസ്റ്റ്.

ആദ്യകാലങ്ങളിൽ മലയാളസിനിമയിലെ പ്രണയനായകൻ ആയിരുന്നു കുഞ്ചാക്കോ ബോബൻ. അനിയത്തി പ്രാവിന് ശേഷം നക്ഷത്രത്താരാട്ട്, നിറം, പ്രേം പൂജാരി, കസ്തൂരിമാൻ, നരേന്ദ്രൻ മകൻ ജയകാന്തൻ വക എന്നിങ്ങനെ നിരവധി ചിത്രങ്ങളിലൂടെ ചോക്ലേറ്റ് ഹിറോ ആയി മാറി ചാക്കോച്ചൻ. എന്നാൽ, 2006 ൽ സിനിമയിൽ നിന്ന് ഒരു ബ്രേക്ക് എടുത്ത ചാക്കോച്ചൻ 2009ലാണ് തിരിച്ചെത്തിയത്. പക്ഷേ, രണ്ടാം വരവിൽ പ്രണയനായകനിൽ നിന്ന് മാറി വ്യത്യസ്തമായ വേഷങ്ങളിലൂടെ ആരാധകരുടെ ഹൃദയം കീഴടക്കി താരം. ട്രാഫിക്, ഹൗ ഓൾഡ് ആർ യു, ടേക്ക്ഓഫ്, വൈറസ്, അഞ്ചാം പാതിര, നായാട്ട്, പട, ന്നാ താൻ കേസ് കൊട് എന്നീ ചിത്രങ്ങൾ കരിയറിലെ തന്നെ മികച്ച ചിത്രങ്ങളായി. ജൂ‍ഡ് ആന്റണി ജോസഫ് സംവിധാനം ചെയ്ത 2018 ആണ് താരത്തിന്റെ നൂറാം ചിത്രം. ആ ചിത്രം നൂറുകോടി ക്ലബിൽ എത്തിയതിന്റെ സന്തോഷത്തിലാണ് താരം.