‘മോൺസ്റ്ററിലെ ഇഷ്ട കഥാപാത്രം ലക്കി സിംഗ് അല്ല, ഇഷ്ടപ്പെട്ടത് ആ കുട്ടിയെ ആണ്’ – തുറന്നു പറഞ്ഞ് മോഹൻലാൽ

ആരാധകർ കാത്തിരിക്കുന്ന മോഹൻലാൽ ചിത്രം മോൺസ്റ്റർ ഇനി തിയറ്ററുകളിലേക്ക് എത്താൻ ദിവസങ്ങൾ മാത്രം. സിനിമയെക്കുറിച്ചുള്ള വിശേഷങ്ങൾ തന്റെ സോഷ്യൽ മീഡിയയിലൂടെ ആരാധകരുമായി പങ്കുവെയ്ക്കുകയാണ് മോഹൻലാൽ. സിനിമയെക്കുറിച്ചുള്ള ഓരോ ചോദ്യങ്ങൾക്ക് മറുപടി നൽകുന്ന വീഡിയോകളാണ് കഴിഞ്ഞ കുറേ ദിവസങ്ങളായി മോഹൻലാൽ സോഷ്യൽ മീഡിയയിൽ പോസ്റ്റ് ചെയ്തു കൊണ്ടിരിക്കുന്നത്.

മോൺസ്റ്ററിൽ തനിക്ക് ഏറ്റവും ഇഷ്ടപ്പെട്ട കഥാപാത്രത്തെക്കുറിച്ചും മോഹൻലാൽ മനസ് തുറന്നു. സിനിമയിൽ വ്യക്തിപരമായി ഏറെ ഇഷ്ടപ്പെട്ട കഥാപാത്രം ഏതെന്ന ചോദ്യത്തിന് അത് ലക്കി സിങ്ങ് അല്ലെന്നാണ് മോഹൻലാൽ നൽകുന്ന മറുപടി. പെട്ടെന്ന് ചോദിച്ചാൽ ലക്കി സിങ്ങ് എന്ന് പറയുമെന്നും എന്നാൽ തനിക്ക് സിനിമ ഷൂട്ട് ചെയ്യുന്ന സമയത്ത് ഏറ്റവും ഇഷ്ടപ്പെട്ടത് ആ കൊച്ചുകുട്ടിയെ ആണെന്നും മോഹൻലാൽ വ്യക്തമാക്കി.

കുറച്ച് സമയമേ ആ കഥാപാത്രം ഉള്ളൂവെങ്കിലും വളരെ പ്രധാനപ്പെട്ടതാണ്. രസകരമായാണ് ആ കുട്ടി അത് ചെയ്തിരിക്കുന്നതും. നിങ്ങൾക്ക് കാണുമ്പോൾ അത് മനസിലാകുമെന്നും മോഹൻലാൽ വ്യക്തമാക്കി. മോൺസ്റ്ററിലെ ഒരു ആശ്വാസമായിരിക്കും ആ കുട്ടിയെന്നും സിനിമയിലെ ഏറെ പ്രധാനപ്പെട്ട കഥാപാത്രമാണ് അതെന്നും മോഹൻലാൽ പറഞ്ഞു. ആ കുട്ടിയും കുട്ടിയോട് ഒപ്പമുള്ള പാട്ടും കാര്യങ്ങളുമൊക്കെ മോൺസ്റ്ററിൽ ഒരു ആശ്വാസമായിരിക്കുമെന്നും മോഹൻലാൽ പറഞ്ഞു.