‘ആറാട്ട്’ ഡബ്ബിംഗ് പൂർത്തിയാക്കി മോഹൻലാൽ; ട്രയിലർ പ്രതീക്ഷിച്ച് ആരാധകർ

നടൻ മോഹൻലാലിന്റേതായി അടുത്തതായി പുറത്തിറക്കാനിരിക്കുന്ന ചിത്രമാണ് ആറാട്ട്. ബി ഉണ്ണിക്കൃഷ്ണൻ സംവിധാനം ചെയ്യുന്ന ചിത്രമായ ആറാട്ടിന്റെ ഡബ്ബിംഗ് മോഹൻലാൽ പൂർത്തിയാക്കി. ചിത്രത്തിലെ തന്റെ ഭാഗങ്ങളുടെ ഡബ്ബിംഗ് ആണ് മോഹൻലാൽ പൂർത്തിയാക്കിയത്. ഇതോടെ ചിത്രത്തിന്റെ ട്രയിലർ ഉടൻ എത്തുമെന്ന് അണിയറപ്രവർത്തകർ വ്യക്തമാക്കി. ക്രിസ്മസിനോ പുതുവത്സര ദിനത്തിലോ ട്രയിലർ എത്തുമെന്നാണ് പ്രതീക്ഷ. ചിത്രത്തിന്റെ ടീസറിന് നേരത്തെ സോഷ്യൽ മീഡിയയിൽ വൻ സ്വീകരണമാണ് ലഭിച്ചത്.

ഒരു മാസ് – മസാല എന്റർടയിൻമെന്റ് ആയിരിക്കും ബി ഉണ്ണിക്കൃഷ്ണൻ സംവിധാനം ചെയ്യുന്ന ആറാട്ട് എന്നാണ് റിപ്പോർട്ടുകൾ. ചിത്രത്തിൽ ആക്ഷനും കോമഡിയും പാട്ടും ഉൾപ്പെടെ ഒരു വാണിജ്യസിനിമയ്ക്ക് ആവശ്യമായ എല്ലാവിധ ചേരുവകളും ഉണ്ടായിരിക്കുമെന്ന് ചിത്രത്തിന്റെ നിർമാതാക്കൾ തന്നെ നേരത്തെ സ്ഥിരീകരിച്ചിരുന്നു. നെയ്യാറ്റിൻകര ഗോപൻ എന്ന കഥാപാത്രത്തെയാണ് മോഹൻലാൽ അവതരിപ്പിക്കുന്നത്. ഉദയകൃഷ്ണയാണ് ചിത്രത്തിന് തിരക്കഥ ഒരുക്കിയിരിക്കുന്നത്. പ്രശസ്ത തെന്നിന്ത്യൻ താരം ശ്രദ്ധ ശ്രീനാഥ് ആണ് ചിത്രത്തിലെ നായികാ കഥാപാത്രത്തെ അവതരിപ്പിക്കുന്നത്.

സിദ്ദിഖ്, സായി കുമാർ, നെടുമുടി വേണു, ഇന്ദ്രൻസ്, ലുക്മാൻ, കെ ജി എഫ് ഫെയിം ഗരുഡ റാം, വിജയരാഘവൻ, സ്വാസിക, രചന നാരായണൻകുട്ടി, ഷീല എന്നിവരാണ് മറ്റ് അഭിനേതാക്കൾ. സംഗീതജ്ഞൻ എ ആർ റഹ്മാൻ ഒരു ഗാനരംഗത്തിൽ ചിത്രത്തിൽ എത്തുന്നുണ്ട്.