ആരാധകർ കാത്തിരുന്ന ചാവേർ എത്തുന്നു, ട്രയിലർ മോഹൻലാൽ പുറത്തിറക്കും

സിനിമാപ്രേമികളെ ആവേശം കൊള്ളിച്ച അജഗജാന്തരം എന്ന സിനിമയ്ക്ക് ശേഷം ടിനു പാപ്പച്ചൻ സംവിധാനം ചെയ്യുന്ന ചിത്രമാണ് ചാവേർ. കുഞ്ചാക്കോ ബോബൻ, അ‍ർജുൻ അശോകൻ, ആന്റണി വർഗീസ് എന്നിവർ പ്രധാന കഥാപാത്രങ്ങളായി എത്തുന്ന ചിത്രം റിലീസിന് ഒരുങ്ങുകയാണ്. ചിത്രത്തിന്റെ ട്രയിലർ സെപ്തംബർ 22ന് റിലീസ് ചെയ്യും. വെള്ളിയാഴ്ച വൈകുന്നേരം ആറു മണിക്ക് നടൻ മോഹൻലാൽ ട്രയിലർ പുറത്തു വിടും. ചിത്രത്തിൽ കിരൺ എന്ന കഥാപാത്രമായാണ് ആന്റണി വർഗീസ് എത്തുന്നത്. ചിത്രത്തിന്റെ പോസ്റ്ററുകൾ നേരത്തെ തന്നെ വൈറലായിരുന്നു.

കുഞ്ചാക്കോ ബോബൻ, ആന്റണി വർഗീസ്, അ‍ർജുൻ അശോകൻ എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. ജോയ് മാത്യുവാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ജസ്റ്റിൻ വർഗീസ് ആണ് സംഗീതസംവിധാനം. നിഷാദ് യൂസഫ് ആണ് ചിത്രത്തിന്റെ എഡിറ്റർ.

ടിനു പാപ്പച്ചൻ സംവിധാനം ചെയ്ത ‘സ്വാതന്ത്യ്രം അര്‍ദ്ധരാത്രിയിൽ’, ‘അജഗജാന്തരം’ എന്നീ സിനിമകൾ സമ്മാനിച്ച തിയേറ്റർ വൈബ് തന്നെയാണ് ‘ചാവേറി’നായി കാത്തിരിക്കാൻ സിനിമാപ്രേമികളെ പ്രേരിപ്പിക്കുന്നൊരു ഘടകം. നടനും സംവിധായകനുമായ ജോയ് മാത്യു തിരക്കഥയൊരുക്കുന്ന ചിത്രം കാവ്യ ഫിലിം കമ്പനി, അരുൺ നാരായൺ പ്രൊഡക്ഷൻസ് എന്നീ ബാനറുകളിൽ അരുൺ നാരായൺ, വേണു കുന്നപ്പിള്ളി എന്നിവർ ചേർന്നാണ് നിർമ്മിക്കുന്നത്.