ഗൾഫിൽ സ്റ്റേജ് ഷോയ്ക്കായി ഒപ്പമെത്തിയ പ്രശസ്തയായ നടി പർദ്ദയിട്ട് ഇറങ്ങി കാറിൽ കയറിപ്പോയി, മനസിലായിട്ടും ഒന്നും ചോദിക്കാൻ കഴിയാതെ വന്നതിനെക്കുറിച്ച് നടൻ മുകേഷ്

അഭിനയജീവിത്തതിനിടയിലെ രസകരമായ കഥകളാണ് മുകേഷ് സ്പീക്കിംഗ് എന്ന യുട്യൂബ് ചാനലിലൂടെ മുകേഷ് പ്രേക്ഷകരുമായി പങ്കുവെയ്ക്കുന്നത്. അത്തരത്തിൽ കഴിഞ്ഞ ദിവസം പങ്കുവെച്ച ഒരു അനുഭവ കഥ സോഷ്യൽമീഡിയയിൽ വൈറലായി മാറുകയാണ്. വർഷങ്ങൾക്ക് മുമ്പ് ഒരു സ്റ്റേജ് ഷോ അവതരിപ്പിക്കാൻ പോയപ്പോഴുള്ള കഥയാണ് മുകേഷ് പങ്കുവെച്ചത്. ടികെ രാജീവ് കുമാറിന്റെ നേതൃത്വത്തിൽ ഗൾഫിൽ സ്റ്റേജ് ഷോയ്ക്ക് പോയ സമയത്ത് നടന്ന ഒരു രസകരമായ സംഭവമാണ് മുകേഷ് പങ്കുവെച്ചത്.

ഖത്തറിൽ വെച്ചായിരുന്നു സ്റ്റേജ് ഷോ. സ്റ്റേജ് ഷോയ്ക്കായി മറ്റ് സ്ഥലങ്ങളിലേക്ക് പോകുമ്പോൾ ആളുകളുടെ മനസിൽ സ്റ്റേജ് ഷോ കഴിഞ്ഞ് ബാക്കിയുള്ള സമയം കൊണ്ട് ബന്ധുക്കൾ ഉൾപ്പെടെയുള്ള വേണ്ടപ്പെട്ടവരെ കാണാമെന്നതാണ്. എന്നാൽ ഇതിന് നിയന്ത്രണം ഉണ്ടായിരുന്നു. ഷോ തുടങ്ങുന്നതിന് മുമ്പ് താരങ്ങൾ പുറത്തിറങ്ങിയാൽ ആളുകൾക്ക് അവരെ കാണാൻ അവസരം ലഭിക്കും. അതുകൊണ്ടു തന്നെ തങ്ങൾക്ക് ഇഷ്ടപ്പെട്ട താരങ്ങളെ കണ്ട സന്തോഷത്തിൽ ആളുകൾ ചിലപ്പോൾ ഷോയ്ക്ക് വരികുമില്ല. അതുകൊണ്ട് താരങ്ങൾ നിരാശരായി. സ്പോൺസറുടെ നേതൃത്വത്തിൽ എല്ലാവിധ സൗകര്യങ്ങളോടും കൂടി ഹോട്ടലിൽ താമസം ആരംഭിച്ചു.

ഒരു ദിവസം ഹോട്ടലിന്റെ ലോബിയിലെ ലിഫ്റ്റിന് അടുത്തായി മുകേഷും രാജീവ്കുമാറും നിൽക്കുകയായിരുന്നു. അവിടെ വന്നുപോകുന്ന സ്പോൺസറും മറ്റുള്ളവരുമായി രാജീവ്കുമാർ കുശലാന്വേഷണം നടത്തുന്നുണ്ട്. പെട്ടെന്ന് ലിഫ്റ്റിനുള്ളിൽ നിന്നും മുഖം ഉൾപ്പെടെ മറച്ച് പർദ്ദ അണിഞ്ഞ ഒരു സ്ത്രീ മുകേഷിനെയും രാജീവ്കുമാറിനെയും കണ്ട് പരിഭ്രമിച്ച് ഇറങ്ങിയടത്തു നിന്ന് തിരിയുകയാണ്. ഒടുവിൽ ഒരുവിധം അവർ പുറത്തിറങ്ങി കാറിൽ കേറി. അത് ഏതോ ഒരു അറബ് സ്ത്രീ എന്നായിരുന്നു രാജീവ്കുമാറിന്റെ ധാരണ. എന്നാൽ, ശരീരഭാഷയിൽ മുകേഷിന് ആളെ പിടികിട്ടി. ആ പർദ്ദയ്ക്കുള്ളിൽ നടി ബിന്ദു പണിക്കർ ആയിരുന്നു. ഇക്കാര്യം രാജീവ് കുമാറിനോട് പറഞ്ഞപ്പോൾ ഇത് പറഞ്ഞു കളിയാക്കുകയോ, മറ്റുള്ളവരോട് പറയുകയോ ചെയ്യരുത് എന്നായിരുന്നു അദ്ദേഹം പറഞ്ഞത്. ഷോയ്ക്ക് മുൻപ് അവർ പിണങ്ങിപോകാൻ ഇടയവരുത് എന്ന ചിന്തയായിരുന്നു രാജീവ്കുമാറിന്റെ ആ നിർദേശത്തിനു പിന്നിൽ.