ലാലിൻറെ പേരിൽ ആയിരം രൂപക്ക് ബെറ്റ് വെച്ച അന്യനാട്ടുക്കാരൻ..! പകുതി തനിക്ക് വേണമെന്ന് മോഹൻലാലും..! പിറന്നാൾ ദിനത്തിൽ രസകരമായ അനുഭവം പങ്ക് വെച്ച് മുകേഷ്

മലയാളികളെ ഏറെ പൊട്ടിച്ചിരിപ്പിച്ചിട്ടുള്ള ഒരു കോംബോയാണ് മോഹൻലാൽ – മുകേഷ്. ഉരുളക്കുപ്പേരി പോലെ അങ്ങോട്ടും ഇങ്ങോട്ടും ഇരുവരും കൗണ്ടർ അടിച്ചു കയറിപ്പോഴെല്ലാം പൊട്ടിച്ചിരിച്ചിട്ടുള്ളത് മലയാളി പ്രേക്ഷകർ. ബോയിങ്ങ് ബോയിങ്ങ്, വന്ദനം, കാക്കക്കുയിൽ, അറബിയും ഒട്ടകവും പി മാധവൻ നായരും എന്നിങ്ങനെ പ്രേക്ഷകർ ഓർത്തോർത്തു ചിരിക്കുന്ന നിരവധി ചിത്രങ്ങൾ ഇരുവരും ഒരുമിച്ച് മനോഹരമാക്കിയിട്ടുണ്ട്. പ്രിയ സുഹൃത്ത് ലാലിൻറെ ജന്മദിനത്തിൽ പഴയൊരു രസകരമായ സംഭവം ഓർത്തെടുക്കുകയാണ് മുകേഷ്.

പ്രിയദർശൻ – മോഹൻലാൽ – മുകേഷ് കൂട്ടുക്കെട്ടിലൊരുങ്ങിയ വന്ദനത്തിന്റെ ഷൂട്ടിംഗ് ബാംഗ്ലൂരിൽ നടക്കുന്ന സമയം. ചിലവ് കൂടുതൽ ആയതിനാൽ തന്നെ വളരെ വേഗത്തിലാണ് ഷൂട്ടിംഗ് തീർത്തു കൊണ്ടിരുന്നത്. എല്ലാ ദിവസവും വളരെയേറെ നേരം ഷൂട്ടിംഗ് നടക്കുമായിരുന്നു. അങ്ങനെ ഇരിക്കേ ഒരു ദിവസം വൈകിട്ട് 5 മണിക്ക് ഷൂട്ട് തീരുമെന്ന് പ്രിയദർശൻ പറഞ്ഞതിനെ തുടർന്ന് മോഹൻലാലും മുകേഷും അധികം ആരും ശ്രദ്ധിക്കാത്ത ഒരിടത്ത് പോയി ഭക്ഷണം കഴിക്കാം എന്ന് തീരുമാനിച്ചു. അങ്ങനെ ഒരു റെസ്റ്റോറന്റിൽ വിളിച്ചു ബുക്ക് ചെയ്തു. ഭക്ഷണം കഴിച്ചു കൊണ്ടിരുന്നപ്പോൾ ഒരാൾ കുറെ നേരമായി മോഹൻലാലിനെ തന്നെ ശ്രദ്ധിച്ചു നോക്കുന്നത് മുകേഷ് കണ്ടു. കുറച്ചു കഴിഞ്ഞപ്പോൾ അയാൾ വന്ന് ‘മലയാളം ആക്ടർ മോഹൻലാൽ അല്ലേ’ എന്ന് ഇംഗ്ലീഷിൽ ചോദിച്ചു. അയാൾ മലയാളി ആയിരുന്നില്ല. അതെയെന്ന് മോഹൻലാൽ ഉത്തരം പറഞ്ഞപ്പോൾ അയാൾക്ക് വളരെ സന്തോഷമായി. കാരണം അദ്ദേഹം സുഹൃത്തുമായി ഇത് മോഹൻലാൽ ആണെന്ന് പറഞ്ഞ് ആയിരം രൂപക്ക് ബെറ്റ് വെച്ചിരിക്കുകയായിരുന്നു. അപ്പോൾ മോഹൻലാൽ അതിന്റെ പകുതി തനിക്ക് വേണമെന്ന് തമാശരൂപേണ പറഞ്ഞു. അപ്പോൾ അയാൾ നൽകിയ മറുപടിയാണ് രസകരം. രാവിലെ അതേ സീറ്റിൽ ജാക്കി ഷെറോഫിനെ പോലെയുള്ള ഒരാൾ വന്നിരുന്നപ്പോൾ ബെറ്റ് വെച്ച് അയാൾക്ക് 1000 രൂപ പോയിരുന്നു. അതിപ്പോഴാണ് ഓക്കേ ആയതെന്നാണ് അയാൾ പറഞ്ഞത്. അപ്പോൾ തന്നെ മോഹൻലാൽ ചിരിച്ചു കൊണ്ട് അയാളോട് മലയാളി അല്ലെങ്കിലും എവിടെയോ ഒരു മലയാളി ടച്ച് എന്നും മറുപടി കൊടുത്തു.